ქუთაისიპოსტი

დათუნა ალადაშვილი ქუთაისი ქართული კულტურის ისტორიული სამშობლოა

– ამ ქალაქში დაიბადა იდეები და ადამიანები, რომელთაც მერე ხელოვნების აბსოლუტურად ყველა დარგში შეიტანეს უმნიშვნელოვანესი წვლილი და შექმნეს ქართული კულტურა. ყოველი წლის 2 მაისს ეს ქალაქი გვირილობას, იგივე ქუთაისობას ზეიმობს.

ამ დღეს 100 წელზე მეტი ხნის ისტორია აქვს და 1911 წლიდან იღებს სათავეს: საქველმოქმედო აქციის მონაწილე გოგონებმა გვირილები დაკრიფეს, გაყიდეს და შეგროვებული თანხით ტუბერკულოზით დაავადებულ ადამიანებს დაეხმარნენ. მერე და მერე ამ ერთმა დღემ ტრადიციის სახე მიიღო და გვირილა იქცა ქალაქის სიმბოლოდ. 1980-იანი წლებიდან უკვე ყოველწლიურად ქუთაისში მაისი განსაკუთრებით სადღესასწაულო თვედ იქცა და ასეა დღემდე.

მსოფლიო მასშტაბით წარმატებული ქართველი პიანისტი, დათუნა ალადაშვილი, გვიზიარებს საკუთარ ემოციებსა და გამოცდილებებს, რომელიც მას ქუთაისთან აკავშირებს: „ქუთაისი ჩემთვის ასოცირდება კულტურასთან – ეს ქალაქი ერთგვარი წყარო და აკვანია ქართული კულტურის. ასოცირდება თეატრთან, მუსიკასთან, ბალანჩინთან და ფალიაშვილთან.

თითქოს როცა შედიხარ ამ ქალაქში, გადადიხარ ფერად ევროპულ კულტურულ სამყაროში, შესაბამისად, განსაკუთრებულად კარგი გრძნობა მეუფლება ყოველთვის, როცა ვსტუმრობ ქუთაისს. ქუთაისელი მსმენელი განსაკუთრებულად თბილი და განსაკუთრებულად მომზადებულია. როცა კი პირადად მაქვს კონცერტი ან თუნდაც შეხვედრა ქუთაისელებთან, მეც განსაკუთრებით ვემზადები. ერთ-ერთი ყველაზე ამოჩემებული ადგილი, რომლის ნახვის გარეშეც ქუთაისს არასდროს ვტოვებ, ეს არის კაფე-რესტორანი „პალატი“, სადაც ცოცხალი მუსიკაც ჟღერს ხოლმე. იქ გატარებული საღამო აუცილებლად მთავრდება Jam session-ით; ასევე აუცილებლად ვსტუმრობ ხოლმე არაჩვეულებრივ კაფეს „დები“ და ყოველთვის ვცდილობ, გავისეირნო მდინარე რიონის პირას. მიყვარს ყველა თაობის ქუთაისელი – ის ადამიანები, რომლებიც ქმნიან ქართულ კულტურასა და ისტორიას. ჩემს თაობაში, ძველ თაობასა და მომავალ თაობაშიც თუკი შეგხვდება წარმატებული ადამიანი, მას აუცილებლად შეუვლია და შეჰყვარებია ქუთაისი. 

ჩემი პროფესიიდან გამომდინარე, ქალაქში ყველაზე ხშირად ვსტუმრობ ქუთაისის მუსიკალურ სკოლას და თეატრს, სადაც გამიმართლა და რამდენჯერმე მქონდა კონცერტი. … ისღა დაგვრჩენია, გავითვალისწინოთ დათუნას რჩევები და როცა ჯადოსნურ და ფერად ქუთაისს ვეწვევით, მოვინახულოთ ყველა მნიშვნელოვანი ადგილი და ვეძებოთ ჩვენი ქუთაისი. იქამდე კი შეგიძლია, ვირტუალურად აღმოაჩინო ქუთაისი ვებგვერდზე gviriloba.ge