ქუთაისიპოსტი

საქმე ეხება, ბიჭიკო ლაღუნდარიძის მკვლელობას, რომელიც 23 წლის წინ ჭიათურაში, გარდაცვლილის სახლთან მოხდა.

ქუთაისის საქალაქო სასამართლომ ჭიათურაში 23 წლის წინ მომხდარი მკვლელობის საქმის წარმოება შეწყვიტა.  

მოსამართლე მაკა გორგოძემ საქმის წარმოების შეწყვეტის გადაწყვეტილება დანაშაულის გადაკვალიფიცირების საფუძველზე მიიღო. საქმე, რომელიც ამ დრომდე აღძრული იყო სისხლის სამართლის კოდექსის 108-ე მუხლით (განზარახ მკველობა), მოსამართლემ 116-ე მუხლით გადააკვალიფიცირა, რაც გაუფრთხილებლობით მკვლელობას ითვალიწინებს.

საქმე ეხება, ბიჭიკო ლაღუნდარიძის მკვლელობას, რომელიც 23 წლის წინ ჭიათურაში, გარდაცვლილის სახლთან მოხდა.

იმერეთის საოლქო პროკურატურის პროკურორის, დავით სიმონიას განმარტებით, მოსამართლე მაკა გორგოძის დღევანდელი გადაწყვეტილება მოულოდნელი იყო.

"ნამდვილად არ ველოდით, ამ გადაწყვეტილებას. ჩვენთვის სრულიად გაუგებარია, თუ რის საფუძველზე გადააკვალიფიცირა საქმე მოსამართლემ. როგორც გვითხრეს, ორ კვირაში მოგვაწოდებენ საბოლოო განაჩენს, სადაც ჩაწერილი იქნება თუ რის საფუძველზე შეწყდა საქალაქოში საქმის წარმოება", - ამბობს პროკურორი, დავით სიმონის.

გარდაცვლილი ბიჭიკო ლაღუნდარიძის და, ცელინა ლაღუნდარიძე საქმის სააპელაციო სასამართლოში გაგრძელებას გეგმავს. ცელინა ლაღუნდარიძის თქმით, ძმის მკვლელი მისივე მეზობელია.

"ადგილი ჰქონდა განზარახ მკველელობას, რომელსაც ჩემივე ძმისშვილი და ერთი მეზობელი შეესწრო. არ ვიცი რა მიზეზით მოკლა. თუმცა, ცხადია, რომ მკვლელობა განზრახ მოხდა", – ამბობს "ქუთაისიპოსტთან" საუბარში ცელინა ლაღუნდარიძე.

გარდაცვლილის ოჯახმა სასამართლოს 1993 წელსვე მიმართა. თუმცა, როგორც ლაღუნდარიძე ამბობს, მაშინ საქმის წარმოება შეგნებულად შეწყვიტეს. თავად, ეჭვიმატანილი ბადრი ბ. კი იმ დროისათვის ჭიათურიდან დროებით წავიდა.

ბიჭიკო ლაღუნდარიძის მკვლევლობის საქმის წარმოება ოჯახმა მას შემდეგ გააახლა, რაც მკვლელობაში ბრალდებული ჭიათურაში საცხოვრებლად რამდენიმე წლის შემდეგ დაბრუნდა და ოჯახის წევრების განცხადებით, ლაღუნდარიძეების შევიწროება დაიწყო.

ლაღუნდარიძეს სააპელაციო სასამართლოში საქმის გასაჩირებისთვის ერთთვიანი ვადა აქვს.