მულტიმედია
თექა - სამყაროს ყველა ფერი (ფოტო/ვიდეო)
FaceBook

მას შეუძლია იყოს ყველაფერი.

შეუძლია მიიღოს მრავალნაირი ფორმა.


აჩვენოს სამყაროს ყველა ფერი.


მისი  არსებობა დაიწყოს და არ დასრულდეს - ათასწლეულებს გადააბიჯოს.


მრავალგზის დააანონსონ მისი გარდაცვალება, მაგრამ ყოველ ჯერზე ახლიდან აღდგეს მკვდრეთით.


შეუძლია ყველაზე ყოფითი და პროზაული დანიშნულებიდან ამაღლდეს უმაღლეს ხელოვნებამდე. მოკვდავებთან და უკვდავებთან ერთნაირად დაიმკვიდროს თავი.


მოერგოს დროს და არ ჩანდეს ძველმოდური.


ეს უნივერსალური მასალა თექაა.  მისი თავდაპირველი სახე მატყლია.  მოთელვის შემდეგ იქცევა თექად. თექად რომელსაც  შეუძლია გახდეს, სამოსი: ქუდი, შარფი, პალტო, ჟილეტი, ფეხსაცმელი, ქამარი.  ან იყოს მხოლოდ ფონი, დეკორაცია, ნაკეთობის დეტალი. იყო ნაბადი, ტომარა, ხალიჩა, ცხენის აღკაზმულობა. გახდეს  ხელოვნების ნიმუში, მხატვრული ტილო. გააჩნია რას დაინახავს მასში ოსტატის თვალი.


ელისო ჩუბინიძე თექიდან მხატვრულ პანოებს ქმნის. მატყლის ფთილა მისი პალიტრაა, რომელიც მხატვრული ნააზრევის გამოსახვაში ეხმარება. თექით ისტორიებს ჰყვება, შალის  ფარტენას კონკრეტულ პერსონაჟებად აქცევს, ან აბსტრაქტულ ნახატებად, რომელსაც არა მხოლოდ თვალით, ხელითაც შეიგრძნობ.



ელისოს თექა  ყოფითი ნივთების დასამზადებლადაც გამოუყენებია. გააჩნია განწყობას, პერიოდს, მოთხოვნილებას.


ყველა ნივთი უმეტესად ხელით მზადდება, შესაბამისად, უნიკალურია და არ მეორდება. მაგალითად, ჩვეულებრივი თექის  შარფი სულაც აღარ არის ჩვეულებრივი. ისეთი განცდა უჩნდება ადამიანს, რომ ხელოვნების ნიმუშს ატარებს.


ლამაზ და ყოვლისშემძლე მასალას, ელისოს აზრით, თერაპიის უნარი აქვს.


„სიმშვიდე მოაქვს, მასთან ურთიერთობა ხასიათსაც სხვანაირს აყალიბებს“.



ელისო  ჩუბინიძის ნამუშევარი

მატყლის თელვის ორი წესი არსებობს - სველი და მშრალი. პირველი, ოსტატობასთან ერთად ფიზიკურ ძალასაც ითხოვს, მეორე  - მოთმინებას.


სველი წესით თექაზე მუშაობა ცელოფნის, 75%-იანი  სარეცხი საპნისა და სხვა მოწყობილობების ჩარევას საჭიროებს.


თექაზე  მშრალი წესით მუშაობისას ტილოს როლს სქელი ღრუბელი ასრულებს, საღებავის ფუნქციას - შალის ფთილა იღებს, ფუნჯად  - ნემსი ან ნემსები გვევლინება.





მუშაობის პროცესში ელისო თექის ისტორიასაც ჰყვება. ეს ტრადიცია ერთ-ერთი ყველაზე ძველია, თუმცა ამით მას მოქნილობა არ დაუკარგავს, ნაბდის, სვანური ქუდის ან ხალიჩის ტყვეობაში არ დარჩენილა.

თექის ოსტატებმა  ნაკეთობები დროს მოარგეს, შეცვალეს ორნამენტები.  თექას მათთვის „წინააღმდეგობა“ არ გაუწევია. იგი სხვა მასალებს შეერია, ან თავად მიიერთა, საკუთარ სხეულში მიიღო. ამით მოახერხა გამოევლო ათასწლეულები და გადარჩენილიყო.


დღეს ბევრი მიმდევარი და მომხმარებელი ჰყავს, რომელთა რაოდენობა სულ იზრდება. მატყლის დამუშავების ქართული ტრადიციებით შექმნილმა თექის ნაკეთობებმა  ბევრჯერ გადალახა საზღვარი და ბევრი უცხოელი ტურისტის ოჯახში დაიდო ბინა.


თექასთან მუშაობას ხელოვნების ფაკულტეტებზე ასწავლიან უმაღლეს სასწავლებლებსა და კოლეჯებში. ელისო ერთ -ერთი ლექტორია. ის თექაზე მუშაობას სტუდენტებს პროფესიულ დონეზე ასწავლის.



ელისოს ჩუბინიძის ნამუშევარი

ფთილის პალიტრად გამოყენება არავის უსწავლებია ხელოვან ნინო სვიმონიშვილსთვის, მაგრამ ბოლო სამი წლის განმავლობაში ის ზედიზედ იმარჯვებს საჩხერეში გამართულ „ყველაზე გაამორჩეული ნაძვის ხის“ კონკურსში. მან გრან-პრი “ლამაზი და ორიგინალური ნაკეთობების” ნომინაციაში აიღო.  ნაძვის ხე, ყოველ ჯერზე თექის იყო.


ნინო სვიმონიშვილის  ხელნაკეთი ნივთების მაღალი ხარისხი გულგრილს არავის ტოვებს.


თავის დროზე ვერც თავად დარჩა გულგრილი ქარგვის, გობელენსა და თექაზე მუშაობის პროცესის მიმართ. საქმემ იმდენად მიიზიდა, რომ დახმარების გარეშე, საკუთარი ძალისხმევით შეისწავლა მუშაობა სხვადასხვა მასალაზე, მათ შორის თექაზეც.


სილამაზის შემჩნევის და მისი მსახურების უნარი მემკვიდრეობით ერგო. მამიდა ზაირა სვიმონიშვილი  მხატვარი გახლდათ. ამიტომ ბევრი რამ ოჯახის უფროსი წევრის საქმიანობაზე დაკვირვებით ისწავლა. მაგრამ რაიმე განსაკუთრებულის და განსხვავებულის, საკუთარი სტილის და სათქმელის  ძიების სურვილი შვილებმა გაუჩინეს.


თექიდან პირველი თოჯინა შვილს დაუმზადა.  შემდეგ ეს მის საყვარელ საქმიანობად იქცა.

 



ნინოს ბევრ ნაკეთობაში თექა ფიგურირებს. რადგან ყველაფერს უხდება და ყველაფერს ერწყმის. მის მიერ დამზადებული ნივთები სხვადასხვა ოჯახის ინტერიერს ალამაზებს და ბევრის ჩაცმის სტილს ხდის გამორჩეულს...
ნინო თექას ახასიათებს როგორც დიდი შესაძლებლობის მქონე მასალას, თითქმის თვითკმარს, რომელსაც ათას რამედ „გადაქცევა“ შეუძლია.

ამას ისე აკეთებს, რომ არ კარგავს ბუნებრიობას, რჩება ნამდვილ და ნატურალურ პროდუქტად ხელოვნური მასალების ეპოქაში. ხელოვნური და ზოგჯერ მავნე ნივთიერებებით გაჯერებულია სათამაშოები. თექის თოჯინები კი სრულიად უსაფრთხოა. ამიტომაც გაიტაცა მისმა შექმნამ. „ვინმე თექის სათამაშოების საწარმოს რომ შექმნიდეს სიამოვნებით შევასწავლიდი და დავეხმარებოდი მათ თოჯინების დამზადებაში“. ვიდრე ეკოლოგიურად სუფთა სათამაშოების წარმოებით ვინმე დაინტერესდება, ნინომ გადაწყვიტა დაგროვებული ცოდნა შვილის კლასელებს გაუზიაროს. სურს, ეს ხელობა იმერეთში რაც შეიძლება მეტმა იცოდეს.

ელისოც ამიტომ მუშაობს სტუდენტებთან. ორივე ოსტატი ფიქრობს, რომ მომავალი თაობა კიდევ უფრო მეტს და განსხვავებულს დაინახავს მატყლის ფთილაში. ორივე დარწმუნებულია, რომ ქართული თექა ახალ ათასწლეულშიც ითამაშებს გამორჩეულ როლს, როგორც „ესთეტი“ და როგორც „თერაპევტი“.

ავტორი: ეკა კუხალაშვილი; თეკლე მორგოშია
FaceBook Twitter
მსგავსი სიახლეები
ფიქრით
ყოველთვის იმ დღეს უბრუნდება, როდესაც მეუღლეს, კაპიტან ვეფხია
ჯიშკარიანს, უკანასკნელად ელაპარაკა.
13:31 / 08.08.2019

ფიქრით ყოველთვის იმ დღეს უბრუნდება, როდესაც მეუღლეს, კაპიტან ვეფხია ჯიშკარიანს, უკანასკნელად ელაპარაკა.

„ადამიანმა
რეალიზება თავის ქვეყანაში და სოფელში უნდა შეძლოს“, -
გადაწყვიტა ნიკა  მანჯავიძემ და ათი წლის შემდეგ, გერმანიიდან
სამშობლოში დაბრუნდა.
14:36 / 30.07.2019

„ადამიანმა რეალიზება თავის ქვეყანაში და სოფელში უნდა შეძლოს“, - გადაწყვიტა ნიკა  მანჯავიძემ და ათი წლის შემდეგ, გერმანიიდან სამშობლოში დაბრუნდა.

მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.
ავტორის/ავტორების მიერ საინფორმაციო მასალაში გამოთქმული მოსაზრება შესაძლოა არ გამოხატავდეს "საქართველოს ღია საზოგადოების ფონდის" პოზიციას. შესაბამისად, ფონდი არ არის პასუხისმგებელი მასალის შინაარსზე.
დღის სიახლეები
ბოლო სამი თვის განმავლობაში პოლიციამ სექსუალური შევიწროების 11 ფაქტი გამოავლინა.
შინაგან საქმეთა სამინისტროს იმერეთის რაჭა-ლეჩხუმისა და ქვემო სვანეთის პოლიციის დეპარტამენტის ქალაქ ქუთაისის საქალაქო სამმართველოს თანამშრომლებმა, ჩატარებული ოპერატიულ-სამძებრო ღონისძიებების შედეგად, ძარცვის ბრალდებით 1982 წელს დაბადებული გ. გ. დააკავეს.
ქუთაისის ეთნოგრაფიული მუზეუმის შენობაზე განთავსებული საათი,  რომელიც ორ კვირაზე მეტი გაჩერებული იყო, დღეს ამუშავდა.
ქართულ მხარესა და ირლანდიურ დაბალბიუჯეტიან ავიაკომპანია „რაინეარს“ შორის ურთიერთთანამშრომლობის შესახებ მემორანდუმი გაფორმდება.
ქუთაისში 26  საჯარო სკოლის მიერ  59 ვაკანსიაა გამოცხადებული მასწავლებლის პოზიციაზე.  
ხონში მცხოვრებმა 12 წლის მარიამ მურღვლიანმა ძალოსნობის ტურნირზე ისევ გაიმარჯვა, რითაც საქართველოს ორგზის ჩემპიონი გახდა.
21 აგვისტოს, ქართულ მხარესა და ირლანდიურ დაბალბიუჯეტიან ავიაკომპანია „რაინეარს“ შორის დღეს ურთიერთთანამშრომლობის შესახებ ხელშეკრულება გაფორმდება.  
ქუთაისში მოსახლეობას წყლის მიწოდება 20-21 აგვისტოს შეეზღუდება.