ქუთაისიპოსტი

ინფექციონისტმა მაია ბუწაშვილმა მედიასთან კურორტებიდან ჩამოტანილ ინფექციურ დაავადებებზე ისაუბრა და აღნიშნა, რომ შემთხვევები საკმაოდ ბევრია.

მისი თქმით, ტურისტულ სეზონთან ერთად იმატებს ნაწლავური ინფექციებით დაავადების რისკი.

„კურორტებიდან დიარეული დაავადებებით ბევრი ადამიანი ბრუნდება. სიმპტომებია: ფაღარათი, გულის რევა, ხშირ შემთხვევაში ტემპერატურაც. ეს ჩვეულებრივი ამბავია, განსაკურებით კი ზაფხულის სეზონზე და განსაკუთრებით კურორტებზე. მიზეზი კი არაერთია. მაგალითად ის, რომ ძალიან ბევრი ადამიანი ერთად იყრის თავს. ასეთ შემთხვევაში კი, ნაწლავური ინფექციები ადვილად ვრცელდება. მეორე ის, რომ საკვები ქსელები გადატვირთულობის გამო, სანუტარულ-ჰიგიენურ ნორმებს კარგად ვერ იცავენ და სიცხეში საკვებში ადვილად მრავლდება მიკროორგანიზმები,“ – აღნიშნა მაია ბუწაშვილმა.

მისი თქმით, ასეთ დროს ძირითადი რეკომენდაცია ბევრი რაოდენობით სითხის მიღებაა.

„რეკომენდაცია, რომ როდესაც კურორტზე ვიმყოფებით, მივიღოთ ბოთლის წყალი ან დარწმუნებულები ვიყოთ წყლის სისუფთავეში. ამასთან, მოერიდეთ ისეთ პროდუქტს, რომლის სისუფთავეშიც არ ხართ დარწმუნებული, მაგალითად სალათები. როდესაც გადატვირთულია კვების ობიექტები, მათი რეცხვა ბოლომდე კარგად არ ხდება. თუ თერმულად არის დამუშავებული ახალმომზადებული საკვები, ის უფრო უსაფრთხოა.

თუ უკვე დიარეაა და ღებინება, ამ დროს ადამიანი უნდა მოერიდოს ხილს და ბოსტნეულს, მხოლოდ მოხარშული საკვები უნდა მიიღოს, ასევე უნდა მოერიდოს ხილის წვენს, სითხე უნდა მიიღოს დიდი რაოდენობით“,- განმარტა ინფექციონისტმა.

მან ანტიბიოტიკებზეც გაამახვილა ყურადღება, რომელსაც ადამიანები თვითნებურად, ერთმანეთის რჩევით იღებენ.

„ბევრი ადამიანი იწყებს თვითნებურად ანტიბიოტიკების ჯგუფის მედიკამენტის მიღებას, ეს არასწორია. დიარეული დაავადებების დროს ანტიბიოტიკები ხშირად სიტუაციას ართულებს, ამიტომ თვითმკურნალობა არ შეიძლება. ამ დროს ბევრი სითხის მიღებაა გამოსავალი. თუ ბავშვი, ან ხანდაზმული ძნელად საკონტაქტოა და ძილიანობაა მომატებული, ექიმი და ჰოსპიტალიზაციაა საჭირო", - განმარტა მაია ბუწაშვილმა.

მისივე თქმით, რუსეთის მოქალაქეების უკონტროლო შემოდინების გამო, ქვეყანაში მთავარ საფრთხედ რჩება აივ ინფექციაც. ამიტომ, ინფექციონისტი მოქალაქეებს განსაკუთრებული სიფრთხილისკენ, ხელისუფლებას კი მიგრანტებისთვის ტესტირების შეთავაზების დანერგვისკენ მოუწოდებს.