ქუთაისიპოსტი

„ნაციონალური მოძრაობის“ ქუთაისის ორგანიზაციის წევრი გიგა შუშანია თეთრი ხიდის ხელახალ რეაბილიტაციას ითხოვს.
მისი თქმით, ხიდის რეაბილიტაციაზე, „ოცნებამ“, წლების წინ, ნახევარი მილიონი ლარი დახარჯა, თუმცა კულტურული მემკვიდრეობის ძეგლი გაკეთების ნაცვლად დააზიანა და ავთენტური სახე დაუკარგა.

ამიტომ შუშანია იმ ადამიანების დასჯასაც ითხოვს, რომლებმაც სამუშაოები , მისი თქმით,  უხარისხოდ ჩაატარეს.

დაზიანებული მინის საფარი

„ხიდის კონსტრუქცია, რომელიც ქვევით არის, მთლიანად დაჟანგული და დაზიანებულია. არაფერს ვამბობ ზედაპირზე, რომელზე გადაადგილებაც ამინდის ოდნავ ცვლილების პერიოდში უსაფრთხო არ არის. ეს მინა წელწადში რამდენჯერმე ზიანდება. ამიტომ, დადგა დრო, მოხდეს თეთრი ხიდის ხელახალი რეაბლიტაცია და პროექტის საჯარო განხილვა. ის ადამიანები კი, რომლებმაც 500 000 ლარი ჩაიდეს ჯიბეში, გაფლანგეს და ასე გააუბედურეს ხიდი, უნდა დაისაჯონ“,- განმარტავს გიგა შუშანია.

მისივე თქმით, თეთრი ხიდის გარდა ისტორიული სახე ეკარგება „ოქროს ჩარდახს“, ასევე, უცნობია როგორი იქნება ქალაქის ცენტრალური ბულვარის საბოლოო სახე.

ოპოზიციონერი დეპუტატის ბრიფინგთან დაკავშირებით, ქუთაისის მერიაში კომენტარს არ აკეთებენ.

ცოტა ხნის წინ, თეთრი ხიდის სავალ ნაწილზე არსებული მინის ერთი მონაკვეთი  გაიბზარა.

ეს ხიდის ზედაპირის დაზიანების პირველი შემთხვევა არ არის. გახსნის დღიდან ხიდზე ხან შუშა დაიბზარა, ხან რკინის საფარი გაფუჭდა.

გადაადგილება საფრთხისშემცველი განსაკუთრებით ზამთრის პერიოდშია. თოვლის ყოველი მოსვლისას ხიდზე არაერთი მოქალაქე ეცემა. 

ქუთაისში ისტორიულ ხიდს რეკონსტრუქცია 2018 წელს ჩაუტარდა. სამუშაოები ადგილობრივ ბიუჯეტს 435 997 ლარი დაუჯდა. საბოლოოდ, მისაღები ხიდის არც ვიზუალი აღმოჩნდა და არც შესრულებული სამუშაოების ხარისხი.

გახსნის დღიდან ხიდზე ხან შუშა დაიბზარა, ხან რკინის საფარი გაფუჭდა. გადაადგილება საფრთხისშემცველი განსაკუთრებით ზამთრის პერიოდშია.