ქუთაისიპოსტი

ქუთაისში, გამოჩენილი ქართველი პედაგოგისა და საზოგადო მოღვაწის, იოსებ ოცხელის მემორიალური დაფა გაიხსნა.

ღონისძიებასთან დაკავშირებით, იოსებ ოცხელის სახლში, მისი ცხოვრებისა და მოღვაწეობის ამსახველი ფოტო-მასალები იყო გამოფენილი.

"აუცილებელია, რომ გამოჩენილი ქართველების შესახებ ინფორმაცია მომავალ თაობებს გადაეცეს. ქუთაისში, საგანმანათლებლო ცხოვრების განვითარებაში იოსებ ოცხელის ღვაწლი ფასდაუდებელია და ეს მემორიალური დაფა უკვე ყველა გამვლელს ამცნობს მისი ღვაწლის თაობაზე," - განმარტეს მემორიალური დაფის გახსნაზე.

ღონისძიებას ქუთაისის ადგილობრივი თვითმმართველობის წარმომადგენლებიც დაესწრნენ.

იოსებ ოცხელი 1865 წელს ქუთაისში დაიბადა. დაწყებითი განათლება ქუთაისის კათოლიკურ სასწავლებელში მიიღო, ხოლო შემდეგ სწავლა ვაჟთა გიმნაზიაში გააგრძელა, რომლის კურსი 1885 წელს დაასრულა.

იმავე წელს, უმაღლესი განათლების მისაღებად, ოცხელი ოდესის უნივერსიტეტის ფიზიკა-მათემატიკის ფაკულტეტზე ჩაირიცხა, რომელიც პირველი ხარისხის დიპლომით დაამთავრა და სამოღვაწეოდ მშობლიურ ქალაქში დაბრუნდა.

იოსებ ოცხელმა 1892 წელს ქუთაისში პირველი ქართული საჩვენებელი საბავშვო ბაღი დააარსა მოსამზადებელი კლასით, რომელსაც დიდი გულმოდგინებით ხელმძღვანელობდა.

1900 წელს "ქართველთა შორის წერა-კითხვის გამავრცელებელმა საზოგადოების" გამგეობამ თანამდებობიდან გაანთავისუფლა ქუთაისის ქართული სკოლის ინსპექტორი, რომლის მუშაობითაც უკმაყოფილო იყო და ამ თანამდებობაზე უკვე საკმაო პედაგოგიური გამოცდილების მქონე იოსებ ოცხელი დაამტკიცა.

აქედან დაიწყო ოცხელის პრაქტიკული პედაგოგიურ-შემოქმედებითი საქმიანობა. მან განიზრახა ქართული სკოლის კერძო გიმნაზიად გადაკეთება და 1905 წელს ეს სურვილი განახორციელა კიდეც. ეს იყო ისტორიულად პირველი ქართული საშუალო სასწავლებელი იმ პერიოდის დასავლეთ საქართველოში.

იოსებ ოცხელი 1919 წელს გარდაიცვალა. დაკრძალულია ქუთაისში, "მწვანეყვავილას" პანთეონში.