ქუთაისიპოსტი

ქუთაისში, ნიკეას ქუჩის მცხოვრებლები აცხადებენ, რომ ნიკეას ნაგავსაყრელიდან უსიამოვნო სუნი ვრცელდება, რის გამოც ფანჯრების გაღებას ვერ ახერხებენ და ყოველდღიური ცხოვრება უჭირთ.

ადგილობრივების თქმით, პრობლემა უკვე დაახლოებით ორ კვირაზე მეტია  გრძელდება.

„ორი კვირაზე მეტია  საშინელი სუნია, დავიტანჯეთ ხალხი.  რა ვერ მოგვარდა ნაგავსაყრელი  საკითხი",  - ამბობენ ადგილობრივები. 


ქუთაისში ნარჩენების მართვას და ნიკეას ნაგავსაყრელზე მიმდინარე სამუშაოებს „საქართველოს მყარი ნარჩენების მართვის კომპანია“ უზრუნველყოფს.

„საქართველოს მყარი ნარჩენების მართვის კომპანია“ აცხადებს, რომ ქუთაისში, ნიკეას ნაგავსაყრელზე მიმდინარეობს სარეაბილიტაციო სამუშაოები, რომლებიც მიმართულია ინფრასტრუქტურის გაუმჯობესებისა და ტერიტორიის მოწესრიგებისკენ.

კომპანიის განმარტებით, სამუშაოებს თან ახლავს დროებითი დისკომფორტი, მათ შორის უსიამოვნო სუნის გავრცელება, რის გამოც ისინი მოსახლეობას ბოდიშს უხდიან.

ამასთან, კომპანიაში აღნიშნავენ, რომ სამუშაოები ეტაპობრივად მიმდინარეობს, თუმცა კონკრეტული დასრულების ვადები განცხადებაში მითითებული არ არის.