აშშ-ის სახელმწიფო დეპარტამენტის ინფორმაციით, საქართველო იმ ქვეყნების სიას დაემატა, რომელთა მოქალაქეებსაც გარკვეული ტიპის ამერიკული ვიზების მისაღებად  სავიზო გირაოს გადახდა უწევთ.

გადაწყვეტილება 18 მარტს გამოცხადდა და საქართველო კიდევ 11 ქვეყანასთან ერთად მოხვდა ამ ჩამონათვალში. ეს ქვეყნებია: კამბოჯა, ეთიოპია, გრენადა, ლესოთო, მავრიკი, მონღოლეთი, მოზამბიკი, ნიკარაგუა, პაპუა-ახალი გვინეა, სეიშელები და ტუნისი.

სავიზო გირაო ვრცელდება მოკლევადიან ვიზებზე — კერძოდ, B1 (ბიზნეს ვიზა) და B2 (ტურიზმი ან სამედიცინო მკურნალობა).  სავიზო გირაოს რაოდენობა შესაძლოა იყოს $5 000, $10 000 ან $15 000, რაც დადგენილი იქნება საკონსულო გასაუბრების დროს.

მნიშვნელოვანია, რომ გირაოს გადახდა ვიზის მიღებას ავტომატურად არ უზრუნველყოფს.

სახელმწიფო დეპარტამენტის განმარტებით, ამ პროგრამის მიზანია იმ შემთხვევების შემცირება, როდესაც ვიზის მფლობელები აშშ-ში ყოფნის ნებადართულ ვადას აჭარბებენ და ქვეყანაში არალეგალურად რჩებიან.

საქართველოსა და სხვა დამატებული ქვეყნების ჩათვლით, ე.წ. „მაღალი რისკის“ ქვეყნების რაოდენობა, რომლებზეც აღნიშნული პროგრამა ვრცელდება, დაახლოებით 50-მდე გაიზარდა.

ცვლილებები ძალაში 2 აპრილიდან შევა.