ქუთაისიპოსტი

ქუთაისში, კლინიკა „უნიქალ მედში“ დღეს  მომხდარ ინციდენტთან დაკავშირებით განცხადებას აკეთებს კლინიკის დირექტორი კახა ნურალიძე.

მისი თქმით, იყო პროვოკაციული ქმედება, ხოლო მის მიმართ გაჟღერებული ბრალდებები — უსაფუძვლოა.

ნურალიძე აცხადებს, რომ კლინიკა წარმატებულად ფუნქციონირებს და მიმდინარე რეორგანიზაციის პროცესი გარკვეული პირებისთვის მიუღებელი აღმოჩნდა.

„ველოდით პროვოკაციას, თუმცა მსგავსი მასშტაბის ფაქტი წარმოუდგენელი იყო. გაოგნებული ვართ. ჩემს მიმართ გავრცელებული ბრალდებები აბსურდული და უსაფუძვლოა. კლინიკა ვითარდება, დამტკიცებულია რეაბილიტაციის გეგმა და მუშაობა წარმატებით მიმდინარეობს. როგორც ჩანს, ეს ზოგიერთს არ მოსწონს და სურთ ძველი, კორუფციული სქემების დაბრუნება, თუმცა მკაფიოდ ვაცხადებ — ეს აღარასოდეს განმეორდება“, —  განაცხადა ნურალიძემ.

მისივე ინფორმაციით, ინციდენტს შესაბამისი უწყებები გამოიძიებენ და დამატებითი დეტალები საზოგადოებას მოგვიანებით მიეწოდება.
ნურალიძე განმარტავს, რომ კლინიკაში მიმდინარეობს რეორგანიზაციის პროცესი და ერთ-ერთი თანამშრომლის მხრიდან ადგილი ჰქონდა პროვოკაციულ ქმედებებს. მისი თქმით, დაპირისპირება მას შემდეგ დაიწყო, რაც რეორგანიზაციის ფარგლებში დაინიშნა გამოცდილი კადრი, რაც აღნიშნულმა თანამშრომელმა უარყოფითად აღიქვა გაურკვეველი მიზეზების გამო.

„მე არ მსურდა მისი სამსახურიდან გათავისუფლება და ვთხოვდი, არ დაეძაბა ვითარება, თუმცა მოგვიანებით სიტუაცია კიდევ უფრო გამწვავდა. ასევე გავრცელდა არასწორი ინფორმაცია, თითქოს ადგილი ჰქონდა მძიმე თვითდაზიანებასა და ქირურგიულ ჩარევას, რაც სიმართლეს არ შეესაბამება. აღნიშნული პირი ამ დროისთვის კლინიკაში არ იმყოფება“, — განაცხადა ნურალიძემ.

მისივე თქმით, ეთიკის კომიტეტი იმსჯელებს, რამდენად შეესაბამება აღნიშნული თანამშრომელი დაკავებულ თანამდებობას.

კლინიკის დირექტორის განცხადებით, „უნიქალ მედ“ მზად არის ითანამშრომლოს ნებისმიერ საგამოძიებო პროცესთან და საზოგადოებას სრული ინფორმაცია მიაწოდოს.

დღეს გავრცელებული ინფორმაციით, ქუთაისში, კლინიკა „უნიქალ მედში“, ექიმის შესაძლო თვითდაზიანების შესახებ გავრცელდა ინფორმაცია, რასაც წინ კლინიკის ხელმძღვანელობასთან დაპირისპირება უძღოდა.

შსს-ს ინფორმაციით გამოძიება 115-ე მუხლით დაიწყო, რაც თვითმკვლელობამდე მიყვანას გულისხმობს.