ქუთაისიპოსტი

"სახელმწიფო უნივერსიტეტებთან ჩვენ გვაქვს ხედვა, რომ თბილისსა და ქუთაისში უნდა იყოს ყველა ფაკულტეტი, ყველა მიმართულება, რაც კი არსებობს, ოღონდ ეს უნდა იყოს პროფილურ უნივერსიტეტებში".


- ამის შესახებ განათლების, მეცნიერებისა და ახალგაზრდობის მინისტრმა, გივი მიქანაძემ, პირველი არხის ეთერში განაცხადა.

მისივე თქმით, თბილისის შემთხვევაში, სოხუმის უნივერსიტეტის ჩათვლით, არის ხუთი უნივერსიტეტი, ხოლო ქუთაისის შემთხვევაში, არის ორი უნივერსიტეტი.

"ამ უნივერსიტეტებში, თითოეულ ქალაქში ეს ყველა ფაკულტეტი უნდა გადანაწილდეს იმ ტრადიციიდან გამომდინარე, რაც მათ მუდმივად ჰქონდათ. მაგალითად, ტექნიკურ უნივერსიტეტს ის მიმართულებები, რაც ტექნიკურ სპეციალობებთან არის დაკავშირებული, თბილისის სახელმწიფო უნივერსიტეტს შესაბამისად, ილიას უნივერსიტეტს შესაბამისად, სამედიცინო უნივერსიტეტს სამედიცინო პროფილები და, რა თქმა უნდა. სოხუმის უნივერსიტეტსაც უნდა ჰქონდეს კონკრეტული მიმართულება. ანალოგიურად უნდა განაწილდეს ეს ფუნქციები უკვე ქუთაისში, ორ უნივერსიტეტს შორის. ამ მოცემულობაში ჩვენ უკვე კონცენტრირებას მოვახდენთ და პლუს ეს ხარჯები მთლიანად უნდა აიღოს თავის თავზე სახელმწიფომ, რადგან ეს არის სახელმწიფოს დაკვეთა“, – განაცხადა გივი მიქანაძემ.

როგორც მან აღნიშნა, საერთო საცხოვრებლები, რა თქმა უნდა, არის აქტუალური თემა და სწორედ ამ ფორმატის ფარგლებში იგეგმება მაღალხარისხიანი საერთო საცხოვრებლების აშენება, რომლებიც დაბალ ფასად იქნება ხელმისაწვდომი იმ ახალგაზრდებისთვის, რომლებიც კონკრეტულ სახელმწიფო უნივერსიტეტებში ისწავლიან.

„ეს არის შემდეგ სამ-ოთხწლიან პერსპექტივაში გათვლილი. რეფორმის კონცეფციის დამტკიცებიდან სამი-ოთხი წლის პერიოდში ვგეგმავთ, ეს პროცესი ბოლომდე დავასრულოთ, თუმცა მისი გარკვეული შედეგები უკვე ეტაპობრივად იქნება ხელშესახები”, – განაცხადა გივი მიქანაძემ.