ქუთაისიპოსტი

არჩევნებამდე ერთი თვით ადრე, „ქართული ოცნების“ პრემიერ-მინისტრმა ირაკლი კობახიძემ ქუთაისში იძულებით გადაადგილებულ პირებს ბინები გადასცა.

პრემიერ-მინისტრი დღეს ქუთაისს ესტუმრა.

ირაკლი კობახიძემ ჯერ 720 დევნილ ოჯახს ნიკეას ქუჩაზე აშენებულ კორპუსებში ბინები გადასცა, შემდეგ კი პარლამენტის ყოფილი შენობის მიმდებარე ტერიტორია დაათვალიერა, სადაც, მთავრობის ადმინისტრაციის ცნობით, თანამედროვე მრავალფუნქციური პარკი მოეწყობა.



ირაკლი კობახიძემ ასევე დაათვალიერა ქუთაისის ტექნოლოგიური ჰაბის მოწყობის სამუშაოები. ჰაბი პარლამენტის ყოფილ შენობაში ეწყობა.

პრემიერ-მინისტრი ასევე იმყოფებოდა ქუთაისის საერთაშორისო აეროპორტში, სადაც ახალი 3.5-კილომეტრიანი ასაფრენ-დასაფრენი ზოლის მშენებლობის პროცესს გაეცნო. ირაკლი კობახიძემ დაათვალიერა აეროპორტის სამეთვალყურეო კოშკურაც, საიდანაც თვითმფრინავების მოძრაობის სრულ კოორდინაციას ასაფრენ-დასაფრენ ზოლსა და სამიმოსვლო ბილიკებზე საქაერონავიგაციის 14 ავიამეთვალყურე უზრუნველყოფს.

გარდა ამისა, ირაკლი კობახიძე ქუთაისში "ბიკენტიას საქაბაბეს" სტუმრობდა. 



თვითმმართველობის არჩევნებამდე ერთ თვეზე ნაკლები რჩება. შესაბამისად, "ქართული ოცნების" მთავრობა ცდილობს ამომრჩევლის გულის მოგებას.

4 ოქტომბრის თვითმმართველობის არჩევნებს ოპოზიციური პარტიების ნაწილი ბოიკოტს უცხადებს