ქუთაისიპოსტი

მას შემდეგ, რაც ქუთაისში, 8 აგვისტოს მემორიალის რეაბილიტაციისთვის გამოცხადებული ტენდერი არ შედგა, მერია სახელმწიფო შესყიდვას [NAT250013392] მეორედ აცხადებს.

შესყიდვის სავარაუდო ღირებულება ამჯერადაც 164 623 ლარია.

სატენდერო დოკუმენტაციის მიხედვით, პროექტი ითვალისწინებს არსებული მოპირკეთების დემონტაჟს, ახლის მოწყობას და ტერიტორიის კეთილმოწყობას. დემონტაჟი ჩაუტარდება პირამიდის კონსტრუქციას და მის ქვეშ მდებარე მემორიალის ქვას.

"მონუმენტიდან 4 მეტრში ეწყობა ქანდაკება, რომლისთვისაც პროექტში გათვალისწინებულია პედესტალის მოწყობა.

ბეტონის ქვაფენილის ნაცვლად ეწყობა პორფირიტის ფილები, რომლითაც ასევე მოპირკეთდება პერიმეტრიული კედელი და ბორდიური. მონუმენტის შუა ნაწილი იფარება დიაბაზის მწვანე ფილით, ხოლო გვერდების მოპირკეთება ხდება წითელი გრანიტის ფილებით. დიაბაზის ფილით მოპირკეთდება ქანდაკების პედესტალიც.

პროექტში ასევე გათვალისწინებულია კიბეების და პანდუსის მოპირკეთება პორფირიტის ფილით. ტერიტორიის კეთილმოწყობა მოიცავს ნარგავების ფორმირებას, გადარგვას და ახალი ნარგავების განთავსებას. ასევე განთავსდება საპარკე სკამები და მოეწყობა მემორიალის განათება",- აღნიშნულია სატენდერო დოკუმენტაციაში.

ამავე დოკუმენტაციის მიხედვით, რეაბილიტაციამდე უნდა განხორციელდეს მოსამზადებელი სამუშაოები და მომზადდეს სამშენებლო მოედანი.

სამუშაოები ხელშეკრულების დადებიდან 60 დღეში უნდა შესრულდეს.

ასეთი უნდა იყოს რეაბილიტირებული მემორიალი:





დაინტერესებულებისთვის წინადადების მიღება 2 აგვისტოს იწყება და 5-ში მთავრდება.

8 აგვისტოს მემორიალი, აღმაშენებლის გამზირზე, 2008 წლის ომის გმირების სხოვნის პატივსაცემად გაიხსნა. ის ბოლოს 2020 წელს შეარემონტეს.

2008 წლის აგვისტოს რუსეთ-საქართველოს ომში საქართველოს თავდაცვის სამინისტროს 170 მოსამსახურე, შინაგან საქმეთა სამინისტროს 14 თანამშრომელი და 224 სამოქალაქო პირი დაიღუპა. დაიჭრა და დაშავდა 2 232 ადამიანი, მათ შორის 1045 სამხედრო მოსამსახურე. 

ამავე თემაზე:

ქუთაისში, 8 აგვისტოს მემორიალის რეაბილიტაცია იგეგმება