ქუთაისიპოსტი

ქუთაისის საქალაქო სასამართლოში დღეს ჭიათურაში დაკავებული მაღაროელების მომდევნო პროცესი გაიმართება.

მერაბ სარალიძის, აჩიკო ჭუმბურიძის, გიორგი ნეფარიძისა და თენგო გველესიანის საქმეზე სხდომა 15:00 საათზე დაიწყება.

ოთხივე დაკავებული, 17 ივლისს, ქუთაისის საქალაქო სასამართლოს მოსამართლემ პატიმრობაში დატოვა.
სასამართლომ მიიჩნია, რომ არსებობს მიმალვის და ახალი დანაშაულის ჩადენის საფრთხე.

მაღაროელებს, რომლებიც უკვე 146 დღეა, უწყვეტ პროტესტში არიან და დაკავებულების გათავისუფლების მოთხოვნით, ერთ თვეზე მეტია, შიმშილობენ, თანამებრძოლების ციხიდან გამოშვების იმედი აღარ აქვთ. ისინი  მიიჩნევენ, რომ ქვეყანაში შერჩევითი სამართალია.

"დღეს კიდევ ერთი სასამართლო პროცესია. რო გითხრა სიმართლე, აღარ გვაქვს იმედი, რომ ბიჭებს გაათავისუფლებენ. ჯერ კიდევ ვაჭრობის ხელსაყრელი საგანია მათთვის დაკავებული ბიჭები, მაგრამ მინდა დაგარწმუნოთ, რომ ის უსამართლობა, რაც ხდება ჭიათურაში, არავის შერჩება. უფალი მაღალია და ყველას თავისას მიუზღვავს დროთა განმავლობაში",- ამბობენ მშრომელები.

ოთხი მაღაროელი 29 აპრილს, გამთენიისას, დააკავეს. როგორც მშრომელები ამბობენ, პოლიციამ ისინი საპროტესტო კარვიდან, ძალის გამოყენებით წაიყვანა.

შსს-ს ინფორმაციით, ბრალდებულები ჭიათურის მუნიციპალიტეტში, შუქრუთის მაღაროს დირექტორს ფიზიკურად დაუპირისპირდნენ და სხეულის სხვადასხვა არეში დაზიანება მიაყენეს.

აღსანიშნავია, რომ მოცემულ საქმეზე გამოძიება თავდაპირველად საქართველოს სისხლის სამართლის კოდექსის 118-ე მუხლის მე-2 ნაწილით გათვალისწინებული დანაშაულის, ჯგუფურად, ჯანმრთელობის განზრახ ნაკლებად მძიმე დაზიანების მუხლით დაიწყო, თუმცა 2025 წლის 30 აპრილს მერაბ სარალიძეს და გიორგი ნეფარიძეს ბრალი სისხლის სამართლის 225-ე მუხლით დაუმძიმდათ, რაც ჯგუფური ძალადობის ორგანიზებას და მასში მონაწილეობას გულისხმობს და 6-დან 9 წლამდე პატიმრობით ისჯება.