ქუთაისიპოსტი

მას შემდეგ რაც სასამართლომ ჭიათურაში დაკავებული 4 პირი პატიმრობაში დატოვა, მაღაროელებმა შიმშილობა დაიწყეს.

ტარიელ მიქაცაძის ინფორმაციით, ამ დროისთვის, მისი ჩათვლით, ჭიათურაში 4 ადამიანი შიმშილობს, თუმცა ეს რიცხვი მზარდია.

მისივე ინფორმაციით, ასევე შიმშილობს მერაბ სარალიძეც, რომელიც ორი თვეა, პატიმრობაშია.

"19 ივნისი უნდა ყოფილიყო ის რიცხვი (როგორც გვპირდებოდნენ სხვადასხვა უწყების თანამშრომლები და ხელმძღვანელები), როცა ბიჭები უნდა გამოეშვათ საპატიმროდან, შემდეგ ჩაინიშნა 12 ივნისს სასამართლო და დატოვეს ბიჭები პატიმრობაში 17 ივლისამდე. ჩვენ უკვე აღარ გვაქვს იმედი, რომ 17 ივლისს გაათავისუფლებენ და რამე კეთილი ნება გააჩნიათ მათ ამ ბიჭების გათავისუფლების. პირიქით, გვაქვს იმის საფუძვლიანი ეჭვი, რომ ამ ბიჭებით უნდათ ივაჭრონ, დატოვონ რაც შეიძლება დიდხანს ციხეში, შესაბამისად, ყველაფერი დაგვათმობინონ თუ კი რამე ბერკეტი გაგვაჩნია. ამიტომ, იმ გულგრილობის, უყურადღებობის, მოტყუების გამო, რაც ამ ხნის განმავლობაში მოდიოდა სხვადასხვა უწყების მხრიდან, გავხდით იძულებული, დაგვეწყო უვადო შიმშილობა",- განმარტა ტარიელ მიქაცაძემ.

12 ივნისს, ქუთაისის საქალაქო სასამართლომ მერაბ სარალიძე, გიორგი ნეფარიძე, თენგიზ გველესიანი და არჩილ ჭუმბურიძე პატიმრობაში დატოვა. მოსამართლემ დაცვის მხარის შუამდგომლობა აღკვეთის სახით გირაოს გამოყენების თაობაზე არ დააკმაყოფილა.

ამავე სისხლის სამართლის საქმეზე წინასასამართლო სხდომა 17 ივლისს არის ჩანიშნული.

ოთხი მაღაროელი 29 აპრილს, გამთენიისას, დააკავეს. როგორც მშრომელები ამბობენ, პოლიციამ ისინი საპროტესტო კარვიდან, ძალის გამოყენებით წაიყვანა.

შსს-ს ინფორმაციით, ბრალდებულები ჭიათურის მუნიციპალიტეტში, შუქრუთის მაღაროს დირექტორს ფიზიკურად დაუპირისპირდნენ და სხეულის სხვადასხვა არეში დაზიანება მიაყენეს.

აღსანიშნავია, რომ მოცემულ საქმეზე გამოძიება თავდაპირველად საქართველოს სისხლის სამართლის კოდექსის 118-ე მუხლის მე-2 ნაწილით გათვალისწინებული დანაშაულის, ჯგუფურად, ჯანმრთელობის განზრახ ნაკლებად მძიმე დაზიანების მუხლით დაიწყო, თუმცა 2025 წლის 30 აპრილს მერაბ სარალიძეს და გიორგი ნეფარიძეს ბრალი სისხლის სამართლის 225-ე მუხლით დაუმძიმდათ, რაც ჯგუფური ძალადობის ორგანიზებას და მასში მონაწილეობას გულისხმობს და 6-დან 9 წლამდე პატიმრობით ისჯება.

ჭიათურელი მაღაროელები უკვე მეხუთე თვეა (109-ე დღე), უწყვეტად აპროტესტებენ კომპანიის მიერ მათი შრომითი უფლებების მძიმე დარღვევებს, მათ შორის, ხელფასების გადაუხდელობას, უკანონო რეორგანიზაციასა და თანამშრომლების მასობრივ გათავისუფლებას. მაღაროელების მოთხოვნებს ახლა უკვე დაემატა 4 უსამართლოდ დაკავებულის გათავისუფლება. როგორც მშრომელები ამბობენ, დაკავებული თანამებრძოლების ციხიდან გამოშვება არის უპირობო და აუცილებელი წინაპირობა იმისთვის, რომ პროცესები დაბრუნდეს ჯანსაღ და სამართლიან ჩარჩოში. მათი გათავისუფლების მოთხოვნით, ჭიათურაში 5 000-ზე მეტი ხელმოწერა შეგროვდა.