ქუთაისიპოსტი

"ჩვენი პოზიცია უცვლელია: ვითხოვთ ბიჭების გათავისუფლებას და ვეწინააღმდეგებით უკანონო რეორგანიზაციას ყველა სამართლებრივი და გონივრული გზით",- ამბობენ მაღაროელები, რომლებიც უკვე 99 დღეა, პროტესტის რეჟიმში იმყოფებიან.

მათ ჭიათურაში, მერიის წინ, კვლავ კარვები აქვთ გაშლილი და სოციალური სამართლიანობის აღდგენის მიზნით ბრძოლას აგრძელებენ.

"უკანასკნელი 90 დღის მანძილზე საზოგადოებას ღიად და არგუმენტირებულად ვუზიარებდით ჩვენს ხედვებს, ვახდენდით მიმდინარე მოვლენების ანალიზს და ვსაუბრობდით იმ რეალობაზე, რომელიც ამ პროცესს თან ახლდა.

ბიჭებთან დაკავშირებით სიახლე ამ ეტაპზე არ გვაქვს, თუმცა ეს არ ნიშნავს, რომ პროცესი გაჩერებულია. მიუხედავად იმისა, რომ ლაივები აღარ გამოგვიქვეყნებია და ყოველი ჩვენი ნაბიჯი საჯარო აღარ არის, ჩვენ აქტიურად ვმუშაობთ ყველა იმ მიმართულებით, რაც ამ ბრძოლას უკავშირდება. ეს მიდგომა გაცილებით მიზანმიმართული და მართებულია, განსაკუთრებით პროცესის ბოლო და გადამწყვეტ ეტაპზე.

აქ გულხელდაკრეფილი არავინ ზის. დღევანდელი ფაზა არ არის პაუზა, ეს არის მომავლის გადამწყვეტი მზადება. ვმუშაობთ დეტალურად, ფხიზლად, წინდახედულად ნებისმიერი სცენარისთვის",- ამბობენ მაღაროელები. 

ჭიათურაში პროტესტი 4 თვეზე მეტია გრძელდება. მაღაროელებმა ქუჩის პროტესტი მას შემდეგ დაიწყეს, რაც კომპანიამ 2024 წლის 1 ნოემბრიდან გაჩერებული მაღაროების ამუშავებაზე უარი განაცხადა. მშრომელებს აღარ ეძლეოდათ არც დაპირებული 60%-იანი ანაზღაურება. შემოსავლების გარეშე დარჩენილი ადგილობრივები, რაიონიდან მადნის მომპოვებელი კომპანიის გასვლას და საწარმოების ნაციონალიზაციას მოითხოვდნენ. ჭიათურელების მზარდ პროტესტს, "ჭიათურა მენეჯმენტ კომპანიმ", რომელმაც ერთი წელია "ჯორჯიან მანგანეზის" მართვა გადაიბარა, მიწისქვეშა სამუშაოების გაჩერებით უპასუხა. შემდეგ კი განაცხადა, რომ სამუშაოებს განაახლებს, მხოლოდ რეორგანიზაციისა და პროტესტის შეწყვეტის შემთხვევაში. პროცესს კი "საქნახშირის" დირექტორი, მიხეილ სოცკი უხელმძღვანელებს.

სოცკსა და მაღაროელებს შორის შეხვედრა რამდენჯერმე შედგა, თუმცა უშედეგოდ. კომპანია მშრომელების მიერ დაყენებულ მოთხოვნებს არ ითვალისწინებს. მაღაროელებს არც მთავრობის რომელიმე წარმომადგენელი ხვდება.