ქუთაისიპოსტი

98 დღე დღეა, რაც ჭიათურაში პროტესტი გრძელდება - ამდენივე დღეა, რაც მშრომელები ხელისუფლებისგან უყურადღებოდ არიან დარჩენილები.

ამ დრომდე, ადგილზე მთავრობის არცერთი წარმომადგენელი არ ჩასულა და არც კომპანია მოდის დათმობაზე. მიუხედავად ამისა, მაღაროელებს ქუჩაში კარვები ისევ აქვთ გაშლილი და ბრძოლას აგრძელებენ.

"ჭიათურა მენეჯმენტ კომპანი" მათ 1 ივნისიდან ახალი, დროებითი ხელშეკრულების გაფორმებას დაპირდა, სამი თვის შემდეგ კი - ინდივიდუალური ხელშეკრულებების, თუმცა აღნიშნულთან დაკავშირებით ჯერ არც ეს შეხვედრა შემდგარა.

მაღაროელებს, ამ დროისთვის, სამი თვის (მარტის, აპრილის და მაისის თვის) ხელფასი აქვთ ასაღები. ისინი ვერ იხდიან ბანკში გადასახადებს და მძიმე სოციალურ პირობებში არიან.

მათ მთავარი მოთხოვნებს ახლა უკვე თანამებრძოლების გათავისუფლებაც დაემატა. 4 მაღაროელი უკვე ერთ თვეზე მეტია, ციხეშია და მათი სასამართლო პროცესი 19 ივნისაა ჩანიშნული.

"ვართ კარავში, ვართ მოლოდინში, რომ იქნებ გაათავისულოს სასამართლომ ბიჭები",- ამბობენ მშრომელები, რომლებმაც თანაქალაქელების გათავისუფლების მოთხოვნით, 5 000-ზე მეტი ხელმოწერა შეაგროვეს.

"ჩვენი მეგობრების გათავისუფლება პატიმრობიდან არის უპირობო და აუცილებელი წინაპირობა იმისთვის, რომ პროცესები დაბრუნდეს ჯანსაღ და სამართლიან ჩარჩოში",- ამბობენ ისინი.

ოთხი მაღაროელი 29 აპრილს, გამთენიისას, დააკავეს. როგორც მშრომელები ამბობენ, პოლიციამ ისინი საპროტესტო კარვიდან, ძალის გამოყენებით წაიყვანა.

შსს-ს ინფორმაციით, ბრალდებულები ჭიათურის მუნიციპალიტეტში, შუქრუთის მაღაროს დირექტორს ფიზიკურად დაუპირისპირდნენ და სხეულის სხვადასხვა არეში დაზიანება მიაყენეს.

მომხდარზე გამოძიება სისხლის სამართლის კოდექსის 118-ე მუხლის მე-2 ნაწილით მიმდინარეობს, რაც ჯანმრთელობის განზრახ ნაკლებად მძიმე დაზიანებას გულისხმობს და 4-დან 9 წლამდე პატიმრობას ითვალისწინებს.

ჭიათურაში პროტესტი 4 თვეზე მეტია გრძელდება. მაღაროელებმა ქუჩის პროტესტი მას შემდეგ დაიწყეს, რაც კომპანიამ 2024 წლის 1 ნოემბრიდან გაჩერებული მაღაროების ამუშავებაზე უარი განაცხადა. მშრომელებს აღარ ეძლეოდათ არც დაპირებული 60%-იანი ანაზღაურება. შემოსავლების გარეშე დარჩენილი ადგილობრივები, რაიონიდან მადნის მომპოვებელი კომპანიის გასვლას და საწარმოების ნაციონალიზაციას მოითხოვდნენ. ჭიათურელების მზარდ პროტესტს, "ჭიათურა მენეჯმენტ კომპანიმ", რომელმაც ერთი წელია "ჯორჯიან მანგანეზის" მართვა გადაიბარა, მიწისქვეშა სამუშაოების გაჩერებით უპასუხა. შემდეგ კი განაცხადა, რომ სამუშაოებს განაახლებს, მხოლოდ რეორგანიზაციისა და პროტესტის შეწყვეტის შემთხვევაში. პროცესს კი "საქნახშირის" დირექტორი, მიხეილ სოცკი უხელმძღვანელებს.

სოცკსა და მაღაროელებს შორის შეხვედრა რამდენჯერმე შედგა, თუმცა უშედეგოდ. კომპანია მშრომელების მიერ დაყენებულ მოთხოვნებს არ ითვალისწინებს.