ქუთაისიპოსტი

ბავშვთა დაცვის დღესთან დაკავშირებით, 1 და 2 ივნისს, ქუთაისის გაბაშვილის, იგივე გორის პარკში, ყველა ატრაქციონი უფასო იქნება.
გაბაშვილის სახელობის კულტურისა და დასვენების პარკის მომსახურებაზე ქუთაისის მერიას გამარტივებული შესყიდვა [SMP250001374] აქვს გამოცხადებული. აღნიშნულისთვის მუნიციპალიტეტი 10 000 ლარის დახარჯვას გეგმავს.

"ქუთაისში, ბავშვთა საერთაშორისო დღესთან დაკავშირებით, დაგეგმილია ბავშვებისათვის ატრაქციონებით მომსახურება. წლების განმავლობაში, აღნიშნულ მომსახურებას ახორციელებდა შ.პ.ს „ბ. გაბაშვილის სახელობის კულტურისა და დასვენების პარკი“, რომელიც ქალაქში ერთადერთია და აღჭურვილია სხვადასხვა ასაკის ბავშვებისათვის განკუთვნილი მრავალფეროვანი და მრავალრიცხოვანი ატრაქციონებით (5 ატრაქციონი).

ადგილობრივი თვითმმართვალობის გადაწყვეტილებით, პატარებს 1 და 2 ივნისს აჩუქებენ დაუვიწყარ დღეებს. ბ. გაბაშვილის სახელობის კულტურისა და დასვენების პარკში ყველა ატრაქციონი მოემსახურება მათ უფასოდ",- ვკითხულობთ შესყიდვის დოკუმენტში.

გარდა ამისა, ქუთაისის მერიას, 1 ივნისს, ქალაქში ღონისძიებები აქვს დაგეგმილი, რისთვისაც 20 000 ლარამდე ღირებულების ტენდერი [NAT250008514] გამოაცხადა.

ბავშვთა დაცვის დღის შესახებ, პირველად, ჟენევის საერთაშორისო კონფერენციაზე, 1925 წელს, ბავშვთა დაცვისა და კეთილდღეობის შესახებ საკითხებზე მსჯელობისას გაჟღერდა, ხოლო ამ დღის არსებობა 1949 წელს განმტკიცდა, მეორე მსოფლიო ომის შემდეგ, როდესაც მთელი მსოფლიოსთვის საფიქრალს მომავალი თაობა წარმოადგენდა.

ბავშვთა დაცვის საერთაშორისო დღე მსოფლიოში, პირველად, 1950 წელს აღინიშნა.