ქუთაისიპოსტი

გამოცდების ეროვნული ცენტრი 2025 წლის გამოცდებისათვის რეგისტრირებულთა სტატისტიკას აქვეყნებს.

naec.ge-ის ინფორმაციით, ერთიანი ეროვნული გამოცდებისათვის დარეგისტრირდა 39 000-ზე მეტი აბიტურიენტი.

ამასთან, სტუდენტთა საგრანტო კონკურსში მონაწილეობის სურვილი 2 400-ზე მეტმა სტუდენტმა გამოთქვა.

გამოცდების ეროვნული ცენტრის ინფორმაციით, საერთო სამაგისტრო გამოცდისათვის რეგისტრაცია 10 000-ზე მეტმა მაგისტრანტობის კანდიდატმა გაიარა.

მათივე ცნობით, მასწავლებლისა და მასწავლებლობის მსურველთა გამოცდებისათვის დარეგისტრირდა 24 300-ზე მეტი აპლიკანტი.

აბიტურიენტების არჩევანი საგნების მიხედვით კი ასე გამოიყურება:

ისტორია აირჩია 18 900-ზე მეტმა აბიტურიენტმა;
მათემატიკა აირჩია 13 700-ზე მეტმა აბიტურიენტმა;
გეოგრაფია აირჩია 2 300-მა აბიტურიენტმა;
ლიტერატურა აირჩია 1 400-ზე მეტმა აბიტურიენტმა;
სამოქალაქო განათლება აირჩია 2 600-ზე მეტმა აბიტურიენტმა;
ქიმია აირჩია 2 100-ზე მეტმა აბიტურიენტმა;
ფიზიკა აირჩია 900-ზე მეტმა აბიტურიენტმა;
ბიოლოგია აირჩია 3 200- ზე მეტმა აბიტურიენტმა;
ხელოვნება აირჩია 200-ზე მეტმა აბიტურიენტმა.

როგორც საგამოცდო ცენტრში განმარტავენ, გამოცდების განრიგი www.naec.ge-ზე დამტკიცებისთანავე გამოქვეყნდება. დეტალური ინფორმაცია გამოცდის თარიღის, საგამოცდო ცენტრის მისამართისა და გამოცდაზე გამოცხადების დროის თაობაზე მითითებული იქნება საგამოცდო ბარათზე, რომლის ამობეჭდვაც, სავარაუდოდ, ივნისის მეორე ნახევრიდან იქნება შესაძლებელი.

2025 წლის რეგისტრაცია ერთიანი ეროვნული გამოცდებისათვის, საერთო სამაგისტრო გამოცდისათვის, სტუდენტთა საგრანტო კონკურსისათვისა და მაწავლებლებისა და მასწავლებლობის მსურველთა გამოცდებისათვის 5 მარტს დაიწყო და 2 აპრილის 18:00 საათზე დასრულდა.