ქუთაისიპოსტი

ევროპარლამენტმა „საქართველოში პოლიტიკური ვითარების კიდევ უფრო გაუარესების შესახებ” რეზოლუცია მიიღო.


რეზოლუცია, რომელსაც 400 ევროპარლამენტარმა დაუჭირა მხარი, ბიძინა ივანიშვილის მთავრობას "დე ფაქტოსა" და თვითგამოცხადებულს უწოდებს, არ ცნობს მას და ლეგიტიმურ პრეზიდენტად სალომე ზურაბიშვილს მიიჩნევს.

ამას გარდა, რეზოლუცია ივანიშვილის რეჟიმს პოლიტპატიმრების გათავისუფლებას, საპროტესტო აქციებზე ძალადობის შემთხვევების გამოძიებასა და ახალი არჩევნების დანიშვნას მოუწოდებს.

ამასთან, რეზოლუცია მიმართავს ევროკავშირსა და მის წევრ ქვეყნებსაც, რომ ბიძინა ივანიშვილსა და მის გარემოცვას, ასევე საქართველოში დემოკრატიულ უკუსვლაზე პასუხისმგებელ პირებს, როგორც ძალოვნებს, ისე მოსამართლეებს, სანქციები დაუწესონ.

მიღებული რეზოლუციის ტექსტში ხაზგასმულია, რომ საქართველოში დემოკრატიული უკუსვლა 2024 წლის 26 ოქტომბრის არჩევნების შემდეგ "დრამატულად დაჩქარდა". აქვე აღნიშნულია, რომ საპარლამენტო არჩევნებმა ვერ დააკმაყოფილა საერთაშორისო დემოკრატიული სტანდარტები და საქართველოს სულისკვეთება ეუთო-ში, დაირღვა "სამართლიანი არჩევნების დემოკრატიული ნორმები და სტანდარტები","შედეგად დაკომპლექტებული "პარლამენტი" და შესაბამისად "პრეზიდენტი" მოკლებული არიან ყველანაირ დემოკრატიულ ლეგიტიმაციას".

რეზოლუცია ბიძინა ივანიშვილის პარლამენტს "დე ფაქტო პარლამენტს" უწოდებს. ასევე აღნიშნულია, რომ 2024 წლის 28 ნოემბერს ირაკლი კობახიძის განცხადებამ, ევროკავშირში გაწევრიანების მოლაპარაკებები 2028 წლამდე გადადო, ძირი გამოუთხარა ქვეყნის ევროატლანტიკურ მისწრაფებებს.

ტექსტში აღწერილია 28 ნოემბრიდან დაწყებული საპროტესტო აქციების მონაწილეებისადმი პოლიციის არაადამიანურად მოპყრობის ფაქტები და ჟურნალისტების მიმართ ძალადობაც. ხაზგასმულია, რომ საპოლიციო ძალებს არ აქვთ მაიდენტიფიცირებელი ნიშნები. საუბარია 2025 წლის 14 იანვრის შემთხვევაზეც, როცა "ქართული ოცნების" წარმომადგენლები თავს დაესხნენ ოპოზიციონერ გიორგი გახარიასა და ჟურნალისტ ზვიად ქორიძეს. ნახსენებია 14 იანვარს ოპოზიციონერი ნიკა მელიისა და გიგი უგულავას დაკავების ფაქტებიც, ასევე 12 იანვარს ელენე ხოშტარიას ბათუმში დაკავების ფაქტიც.

დემონსტრანტებისადმი არაპროპორციული ძალის გამოყენებასთან ერთად ხაზგასმულია, რომ "თვითდანიშნულმა ხელისუფლებამ შემოიღო ახალი დრაკონული კანონები".

რეზოლუციის მიღებას ჯამში 544 ევროპარლამენტარიდან 400-მა დაუჭირა მხარი, წინააღმდეგი იყო 63, ხოლო 81-ს კენჭისყრაში მონაწილეობა არ მიუღია.

რეზოლუციის ავტორი 57 ევროპარლამენტარია. კენჭისყრაზე წარდგენილი ტექსტი მწვანეები-ევროპული თავისუფალი ალიანსის (Verts/ALE), ევროპის სახალხო პარტიის (EPP), სოციალისტებისა და დემოკრატების პროგრესული ალიანსის (S&D), ევროპული განახლებისა (Renew) და ევროპელი კონსერვატორებისა და რეფორმისტების (ECR) ინიციირებული რეზოლუციების საფუძველზე შეიქმნა.

ევროპარლამენტის მიერ მიღებულ რეზოლუციას "ქართული ოცნების" პოლიტიკური საბჭო განცხადებით გამოეხმაურა, სადაც აღნიშნულია, რომ ევროპარლამენტის სერიოზულად აღქმა შეუძლებელია.

"ჯერ კიდევ 2023 წლის 26 მარტს, ამერიკის შეერთებული შტატების მომავალმა პრეზიდენტმა, დონალდ ტრამპმა ამომრჩევლებთან შეხვედრის დროს განაცხადა: „ეს გადამწყვეტი ბრძოლაა. ან „დიფ სთეითი“ გაანადგურებს ამერიკას, ან ჩვენ უნდა გავანადგუროთ „დიფ სთეითი“. პრეზიდენტად არჩევის შემდეგ, დონალდ ტრამპი ამ გადამწყვეტ ბრძოლაში აქტიურად ჩაება და ჩვენ წარმატებას ვუსურვებთ მას „დიფ სთეითის“ განადგურების საქმეში.

ჩვენი მხრივ, დღეს მიღებული რეზოლუციის საპასუხოდ გვსურს განვაცხადოთ, რომ ან „დიფ სთეითი“ გაანადგურებს ევროკავშირს, ან ევროკავშირი გამონახავს ძალას, რომ როგორმე თავი დააღწიოს „დიფ სთეითის“ გავლენას.

როგორც პრეზიდენტ ტრამპს ვუსურვებთ გამარჯვებას „დიფ სთეითის“ წინააღმდეგ ბრძოლაში, ასევე ევროპასაც ვუსურვებთ, რომ თავი დააღწიოს „დიფ სთეითის“ მავნე ზეგავლენას. ჩვენ ამ ბრძოლაში პატრიოტი ევროპელების მხარეს დავდგებით.
ასევე გვსურს საზოგადოებას შევახსენოთ უნგრეთის პრემიერ-მინისტრის, ვიქტორ ორბანის გუშინდელი განცხადება - „ევროპული ინსტიტუტების სერიოზულად აღქმა შეუძლებელია“.

ჩვენი აზრით, სამწუხაროდ, ევროპარლამენტის სერიოზულად აღქმა დღეს აბსოლუტურად შეუძლებელია",- წერია "ოცნების" პოლიტიკური საბჭოს განცხადებაში. 

26 ოქტომბერს ჩატარებული არჩევნების შედეგებს და პარლამენტის ლეგიტიმურობას არ აღიარებს სალომე ზურაბიშვილი, ბარიერგადალახული ოპოზიციური პარტიები და დემონსტრანტები, რომლებიც 77-ე დღეა აქციებს მართავენ ახალი საპარლამენტო არჩევნების დანიშვნის და საპროტესტო აქციებზე დაკავებულთა გათავისუფლების მოთხოვნით. საპროტესტო აქციების მონაწილეები ხელისუფლებას ევროინტეგრაციის პროცესის შეჩერებაში ადანაშაულებენ.