ქუთაისიპოსტი

28 ნოემბრის ღამეს, აქციის ორგანიზატორის, მიშა მუმლაძის დაკავების მიუხედავად, აქცია კვლავ გაიმართება. დღეს, მოქალაქეები ქუთაისის მერიის წინ, 17:00 საათზე შეიკრიბებიან და კიდევ ერთხელ გააპროტესტებენ "ქართული ოცნების" გადაწყვეტილებას, ევროკავშირთან მოლაპარაკებების შეჩერების შესახებ. აქციაზე მთავარი მოთხოვნა იქნება მიშა მუმლაძის განთავისუფლება, რომელიც ამ დრომდე სამტრედიის პოლიციაში, წინასწარი დაკავების იზოლატორში იმყოფება.

28 ნოემებრს, "ქართული ოცნების" ქუთაისის ოფისთან, აქტივისტები სპონტანურად, მას შედეგ შეიკრიბნენ, რაც "ქართული ოცნების" პრემიერ-მინისტრმა ირაკლი კობახიძემ განაცხადა, რომ საქართველო მომდევნო ოთხი წლის განმავლობაში აჩერებს ევროკავშირში გაწევრიანებასთან დაკავშირებულ მოლაპარაკებებს. კობახიძის ამ განცხადებას პროტესტი მოჰყვა დედაქალაქშიც. ათიათასობით მოქალაქე რუსთაველზე შეიკრიბა და ქვეყნის ევროპული კურსიდან გადახვევა გააპროტესტა. "ქართულმა ოცნებამ" მშვიდობიანი დემონსტრანტების დასაშლელად რობოკოპები გამოიყვანა, რომლებიც აქციის მონაწილეებსა და მედიის წარმომადგენლებს ფიზიკურად უსწორდებოდნენ. აქციაზე გამოიყენეს წყლის ჭავლი და წიწაკის სპრეი, რომელსაც აქციის მონაწილეების თქმით, სპეცრაზმელები დამიზნებით ასხამდნენ სახეში. აქციაზე დაშავდა ათობით მოქალაქე, ჟურნალისტი და ოპერატორი. მძიმე დაზიანება მიიღო ტელეკომპანია "ფორმულას" ჟურნალისტმა გურამ როგავამ, რომელსაც სპეცრაზმელმა პირდაპირ ეთერში სცემა. მას სახის ძვლების და კისრის მეშვიდე მალის რკალის მოტეხილობა აქვს.