ქუთაისიპოსტი

პროტესტის 22-ე დღეს, რუსული კანონის მოწინააღმდეგეები, ქუთაისის პარლამენტის ყოფილ შენობასთან შეიკრიბებიან და მსვლელობას გამართავენ.

მსვლელობა დღეს, 8 მაისს, 18:30 საათზე, ავტოქარხნის უბნის მიმართულებით მოეწყობა.

აქციის მონაწილეების თქმით, პროტესტის ხმა რუსული კანონის წინააღმდეგ მთელს ქალაქში უნდა ისმოდეს და მთელი ქუთაისი მოიცვას.

„გელოდებით ყველას, ვინც საქართველოს ევროპულ მომავალს უჭერთ მხარს“,- განმარტავენ რუსული კანონის მოწინააღმდეგეები.

„ქართულმა ოცნებამ“ რუსული კანონი, პირველი მოსმენით 17 აპრილს, მეორე მოსმენით კი პირველ მაისს მიიღო. მას მხარი 83-მა დეპუტატმა დაუჭირა.

„უცხოური გავლენის გამჭვირვალობის შესახებ“ კანონპროექტი, რომელიც ფრაქცია "ქართული ოცნების" სახელით არის რეგისტრირებული, შინაარსით გასულ წელს ინიცირებული და საპროტესტო აქციების შედეგად გაწვეული პროექტის ანალოგიურია.

კანონპროექტის მიხედვით, ორგანიზაციებს, რომლებიც დაფინანსების 20%-ზე მეტს უცხოეთიდან იღებენ „უცხოური ძალის ინტერესების გამტარებლის“ სტატუსი მიენიჭებათ. კანონპროექტი უცხოური ძალის ინტერესების გამტარებელ ორგანიზაციად რეგისტრაციის ვალდებულებას ადგენს, რომლის დარღვევისთვის ფინანსური სანქციებია გათვალისწინებული.

ანალოგური შინაარსის კანონი რუსეთშიც მოქმედებს, რაც დამოუკიდებელი მედიასაშუალებებისა და საზოგადოებრივი ორგანიზაციების ფაქტობრივი გაქრობის მიზეზი გახდა.

ამ კანონს, რომლის მიზანიც ქვეყანაში დასავლური დაფინანსების მქონე ორგანიზაციების დისკრედიტაცია და შეზღუდვაა, საქართველოში არაერთი საზოგადოებრივი ჯგუფი ეწინააღმდეგება. ამასთან, წინააღმდეგია აშშ, ევროკავშირი და არაერთი დასავლური ორგანიზაცია.