ქუთაისიპოსტი

ორგანიზაცია „რეპორტიორები საზღვრებს გარეშე"-ს ინფორმაციით, საქართველო პრესის თავისუფლების ინდექსით 53.05 ქულით, 180 ქვეყანას შორის 103-ე ადგილზეა.
მაშინ როცა 2023 წლის რეიტინგში საქართველოს, 180 ქვეყანას შორის, 61.69 ქულით 77-ე ადგილი ეკავა.

ორგანიზაცია აღნიშნავს, რომ საქართველოში თვალშისაცემია ჟურნალისტებისადმი მტრული დამოკიდებულება, მათი შევიწროების მცდელობა შესაბამისი კანონების მიღებით.

განცხადებაში ასევე ნათქვამია, რომ მართალია ქართული კანონმდებლობა პოლიტიკურ პარტიებს მედია საშუალებების ფლობას უკრძალავს, მაგრამ მსხვილი ქსელების მფლობელებს ხშირად აქვთ მჭიდრო კავშირები პოლიტიკურ ლიდერებთან.

''იგივე ეხება სახელმწიფო მედიას, რომელიც ექვემდებარება ხელისუფლების ჩარევას. ამავდროულად, ხელისუფლება ხშირად უარს ამბობს პასუხი გასცეს მედიას, რომელიც მათ აკრიტიკებს და ზოგჯერ მიმართავს ცენზურას, დარბევას, ცილისწამების კამპანიას და დაშინებას“, - აღნიშნულია აღწერაში.

დოკუმენტში ასევე ვკითხულობთ, რომ ხშირია ჟურნალისტების სიტყვიერი და ფიზიკური შეურაცხყოფა, მათ შორის, ხელისუფლების მაღალჩინოსნების მხრიდან. ჟურნალისტებზე თავდამსხმელი პირები კი ხშირად დაუსჯელები რჩებიან.