ახალი ამბები
ფასადის შეკეთება კორპუსის გამაგრების ნაცვლად - მოსახლეობის პროტესტი და ჩაშლილი ტენდერი ქუთაისში
FaceBook
ქუთაისის მერია იმ კორპუსის ფასადის შეკეთებას გეგმავდა, რომელიც იერსახის მოწესრიგებაზე მეტად გამაგრებას საჭიროებდა.

საუბარია რუსთაველის გამზირზე მდებარე ( N110; 112; 114) კორპუსზე. აღსანიშნავია, რომ ერთი კორპუსია, რომელსაც სამი დამისამართება (ნომერი) აქვს მინიჭებული. 

აღნიშნული შენობის ფასადის მოსაწესრიგებლად ქუთაისის მერიამ ტენდერი (NAT230002783) ისე გამოაცხადა, რომ პროექტი  მოსახლეობასთან არ შეათანხმა. შედეგად, ადგილობრივები წარმოდგენილი პროექტით სამუშაოების შესრულების წინააღმდეგ წავიდნენ, რასაც ტენდერის შეწყვეტა მოჰყვა.


რუსთაველის გამზირი N112

''ამ პროექტის მიხედვით, ბათქაში უნდა ჩამოეყარათ. ეს კი ძალიან საშიშია, რადგან ბინა ძველი აშენებულია და სიმძიმეს ვერ გაუძლებდა. ამას სჯობდა გამაგრება დაეწყოთ, რაც ამ კორპუსს ნამდვილად სჭირდება,''-ამბობს რუსთაველის გამზირი N112-ის მცხოვრები ლელა კობერიძე.

პროექტი, რომელითაც მერია ფასადის შეკეთებას გეგმავდა, შენობაზე არსებული ბუნებრივი ქვის მოხსნას, ქვიშა-ცემენტის კარნიზის ჩამონგრევას, ლითონის მოაჯირის გაკეთებას და სხვა სახის სამუშაოებს მოიცავდა. ეს კი, ადგილობრივების თქმით, შენობას ავთენტურობასაც დაუკარგავდა.

''შენობა ეკლის ქვით არის მოპირკეთებული. ასეთი ქვით ქალაქში სულ რამდენიმე შენობაა, ამიტომ სხვა მასალის გამოყენებას ვერ დავუშვებდით. კორპუსმა ისტორიული იერ-სახე უნდა შეინარჩუნოს,''- ამბობს რუსთაველის გამზირის N112-ის ერთ-ერთი მცხოვრები.

რუსთაველის გამზირი

მერიაში ადასტურებენ, რომ რუსთაველის გამზირი (N110; 112; 114) კორპუსის ფასადის მოსაწესრიგებლად გამოცხადებული ტენდერი მოსახლეობის პროტესტის გამო შეწყდა, თუმცა არაფერს ამბობენ იმაზე, რატომ არ შეათანხმეს პროექტი ადგილობრივებთან, ან ჰქონდათ თუ არა შენობის მდგრადობა შესწავლილი. 

ქუთაისის მერიამ  2023 წელს, 409 075 ლარის ღირებულების ელეტრონული ტენდერი (NAT230002783) გამოაცხადა. სახელმწიფო შესყიდვის  ვებგვერდზეც მითითებულია, რომ ის შეწყდა. მერიის მიერ ატვირთული დოკუმენტაციითაც  დასტურდება, რომ ტენდერის შეწყვეტის მიზეზი მოსახლეობის პროტესტი გახდა. 

რეალურად საჭიროებდა თუ არა შენობა ფასადის შეკეთებას ან   გეგმავენ თუ არა კორპუსის გამაგარებას, მერიიდან მოგვწერეს, რომ:

''მერიაში არ ფიქსირდება მომართვაში აღნიშნული ქონების მესაკუთრეთა მომართვა ან/და საექსპერტო დასკვნა, რომელიც აღწერს ან/ და ადასტურებს მათ საკუთრებაში არსებული ქონების კონსტრუქციული არამდგრადობის შესახებ თქვენს მიერ აღწერილ ინფორმაციას", - წერია  ჩვენთვის გამოგზავნილ  წერილში. 

თუმცა, მოსახლეობას მერიისთვის არც ფასადის შეკეთებაზე მიუმართავს. მიუხედავად ამისა, ტენდერი მაინც გამოაცხადეს. 

2023 წელს ქუთაისში მრავალსართულიანი სახლების ფასადების რეაბილიტაციისათვის 2 721 520 ლარი დაიხარჯა.
Print E-mail
FaceBook Twitter
მსგავსი სიახლეები
ქუთაისში, მედიისა და სამოქალაქო სექტორის წარმომადგენლებმა
14:30 / 12.04.2024
ქუთაისში, მედიისა და სამოქალაქო სექტორის წარმომადგენლებმა "ოცნების" მიერ ინიცირებული "უცხოური გამჭვირვალობის შესახებ" კანონპროექტი, იგივე რუსული კანონი გააპროტესტეს.
პროკურატურის ცნობით, თბილისის საქალაქო სასამართლომ 
11:51 / 12.04.2024
პროკურატურის ცნობით, თბილისის საქალაქო სასამართლომ  "ქურდული სამყაროს“  წევრობასა და  "ქურდული სამყაროს“  საქმიანობის მხარდაჭერაში ბრალდებული 10 პირი დამნაშავედ ცნო.

მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.
ავტორის/ავტორების მიერ საინფორმაციო მასალაში გამოთქმული მოსაზრება შესაძლოა არ გამოხატავდეს "საქართველოს ღია საზოგადოების ფონდის" პოზიციას. შესაბამისად, ფონდი არ არის პასუხისმგებელი მასალის შინაარსზე.