ქუთაისიპოსტი

სახალხო დამცველის განცხადებით, ომბუდსმენის აპარატი იკვლევს, შესაძლებელი იყო თუ არა სტიქიის შედეგად გამოწვეული ტრაგიკული შემთხვევების თავიდან აცილება.
ეს განცხადება ლევან იოსელიანმა ბაღდათის მუნიციპალიტეტსა და ხულოში მომხდარ სტიქიებზე საუბრისას გააკეთა.

ამ კონტექსტში სახალხო დამცველმა შოვში მომხდარი ტრაგედიაც ახსენა.

"ჩვენ, რა თქმა უნდა, ვმუშაობთ ეკოლოგიაზე, ეკოლოგიის შედეგად წარმოქმნილი სტიქიური უბედურების შედეგად დაზარალებული ადამიანების უფლებებზე, მათ შორის, შოვის ნაწილზეც. რა თქმა უნდა, ამ ნაწილზეც ჩავერთვებით. ვიკვლევთ, გააკეთა თუ არა ყველაფერი სახელმწიფომ იმისთვის, რომ აცილებული ყოფილიყო თავიდან ესა თუ ის უბედური შემთხვევა, თუ სტიქია", - განმარტა ლევან იოსელიანმა.

9 გარდაცვლილი, ერთი დაშავებული, მიწის მასაში მოყოლილი ოთხი საცხოვრებელი სახლი და 20 ევაკუირებული ადამიანი - ასეთია ორი დღის წინ განვითარებული სტიქიის შედეგი ბაღდათის სოფელ ნერგეეთში. სოფელში მეწყერი 7 თებერვალს, ღამის ორ საათზე ჩამოწვა.
გარემოს ეროვნული სააგენტოს ინფორმაციით, მეწყრული პროცესის ჩასახვა-გააქტიურება, რთულ ტექტონიკურ და მორფოლოგიურ პირობებთან ერთად, ძირითადად, 5-6-7 თებერვალს მოსულმა უხვმა ატმოსფერულმა ნალექებმა გამოიწვია.

ოფიციალური ინფორმაციით, ნერგეეთში მეწყერის სიმაღლე 30 მეტრი იყო, მეწყრული მასის საორიენტაციო მოცულობა კი 150 000 მ3-ს შეადგენდა. მიწის მასა გზის დაახლოებით 200-მეტრიან მონაკვეთზე ჩამოიშალა, რასაც მსხვერპლი მოჰყვა. 

სტიქია მსხვერპლით დამთავრდა ხულოსა და ქედაშიც, სადაც ზვავისა და მეწყრის შედეგად 2 ადამიანი დაიღუპა. 

რთული მდგომარეობაა სურამსა და ქვიშხეთშიც, სადაც მთის მასა იმ ადგილას ჩამოწვა, სადაც რამდენიმე ოჯახი ცხოვრობს. დაზიანდა სახლები, დაშავებული არავინაა. სურამში კი, სადაც მეწყრული პროცესები გასულ ღამეს, ზინდისის დასახლებაში განვითარდა, ამ დროისათვის 40 ოჯახია ევაკუირებული. ადგილზე მუშაოებენ გეოლოგები. 

ძლიერმა ქარმა და უხვმა ნალექმა პრობლემები საქართველოს თითქმის ყველა მუნიციპალიტეტში შექმნა. ბოლო ორი დღის განმავლობაში, მხოლოდ იმერეთში, მეწყერული პროცესი 50-მდე ლოკაციაზე განვითარდა.


ამავე თემაზე:

ნერგეეთის მეწყერული ზონიდან 20-მდე ადგილობრივი გაიყვანეს

ნერგეეთში სამძებრო სამუშაოები დასრულებულია, მიმდინარეობს ტერიტორიის გასუფთავება

ნერგეეთის შემდეგ, მეწყრული პროცესები ზესტაფონშიც განვითარდა - ელოდებიან სპეციალისტებს

რამ გამოიწვია მეწყერი ნერგეეთში - გარემოს ეროვნული სააგენტოს განმარტება

სტიქიამ იმერეთში 600-ზე მეტი სახლი, სკოლები და საბავშვო ბაღები დააზიანა

მოგლეჯილი ხეები, დაზიანებული ელექტროგადამცემი ხაზები და გაზსადენი მილები - უამინდობა იმერეთში