ახალი ამბები
200-მდე აღსაზრდელიანი საბავშვო ბაღის არამდგრადი შენობის რეაბილიტაციის ბედი გაურკვეველია
FaceBook
ქუთაისის მერმა არ იცის, რა ბედი ეწევა ქალაქის მე-14 საბავშვო ბაღის შენობას, რომელშიც სასწავლო-სააღმზრდელო პროცესი შენობის არამდგრადობის გამო შეწყდა.
როგორც იოსებ ხახალეიშვილმა ქუთაისის 2024 წლის ბიუჯეტის პროექტის საჯარო განხილვის შეხვედრაზე მშობლის საპასუხოდ განმარტა, ბაღის შენობის რეაბილიტაცია მომავალი წლის ბიუჯეტში ჩასმული არ არის.

„ჩვენ ველოდებოდით ექსპერტიზას და სამწუხაროდ, მივიღეთ არადამაკმაყოფილებელი პასუხი, რის გამოც დაუყონებლივ მოვახდინეთ ბავშვების გადანაწილება სხვადასხვა საბავშვო ბაღში. მომდევნო წლისთვის 4 ბაღის რეაბილიტაციაა განსაზღვრული, ამასთან, დამატებით ერთ, ახალ ბაღს აშენებს მგფ.  თქვენი ბაღის რეაბილიტაცია მომავალი წლის ბიუჯეტში გათვალისწინებული არ არის, ეს პირდაპირ შემიძლია ვთქვა, ღია ინფორმაციაა, თუმცა ვეცდებით, რომ ისეთი ბაღებისთვის, რომელთა რეკონსტრუქციის გადაუდებელი საჭიროება არსებობს, ცენტრალურ ხელისუფლებასთან თანამშრომლობით, მოვახდინოთ თანხების მოძიება“,
- განმარტა იოსებ ხახალეიშვილმა.

ექსპერტიზის პასუხში მხოლოდ ის წერია, რომ ობიექტი გამაგრება/გაძლიერებითი სამუშაოების ჩატარებას საჭიროებს, რაც იმას ნიშნავს, რომ შენობის დანგრევა აუცილებელი არ არის. 




ქუთაისის მე-14 საბავშვო ბაღში სასწავლო-სააღმზრდელო პროცესი, 18 სექტემბერს, დაბზარულ კედლებში განახლდა, რასაც მშობლების პროტესტი მოჰყვა. საფრთხისშემცველი შენობის გამო, დედების ნაწილს ბავშვები ბაღში აღარ დაჰყავდა, ნაწილი კი შვილის სხვაგან გადაყვანას გეგმავდა.

მას შემდეგ კი, რაც ექსპერტიზამ ობიექტის ტექნიკური მდგომარეობა საფრთხის შემცველად შეაფასა, ადმინისტრაციამ აღსაზრდელები "ბაგა-ბაღების გაერთიანების" სხვა ფილიალებში გადაიყვანა.

მაშინ, ბაღების გაერთიანების ხელმძღვანელი დავით წიტაიშვილი „ქუთაისიპოსტთან“ განმარტავდა, რომ შენობის გასამაგრებელ სამუშაოებზე ტენდერს უახლოეს დღეებში გამოაცხადებდნენ, თუმცა შესყიდვების ვებ-გვერდზე არაფერი განთავსებულა.

ქუთაისის მე-14 საბავშვო ბაღს 200-მდე აღსაზრდელი და 40-მდე თანამშრომელი ჰყავს.

ამავე თემაზე:

"კედლები არის დახსნილი, გვეშინია ბავშვების გაჩერების" - რა ხდება ქუთაისის საბავშვო ბაღში

"საფრთხის შემცველია" - ქუთაისის მე-14 საბავშვო ბაღთან დაკავშირებით ექსპერტიზის დასკვნა ცნობილია

Print E-mail
FaceBook Twitter
მსგავსი სიახლეები
11:50 / 30.08.2025
"ევროკავშირი საქართველოს მთავრობას მოუწოდებს, დაუყოვნებლივ გააუქმოს დამოუკიდებელი სამოქალაქო საზოგადოების ორგანიზაციების საბანკო ანგარიშების დაყადაღების გადაწყვეტილება",-

ამის შესახებ განცხადებას საგარეო და უსაფრთხოების პოლიტიკის საკითხებში ევროკავშირის მთავარი პრესსპიკერი, ანიტა ჰიპერი ავრცელებს.

განცხადებაში ნათქვამია, რომ გადაწყვეტილება ფუნდამენტურ უფლებებზე მორიგი თავდასხმა და სასამართლო სისტემის, როგორც რეპრესიის ინსტრუმენტის, გამოყენებაა.

“ეს ფინანსური განზრახ გაგუდვის მეშვეობით პოლიტიკური დევნის აქტია, რომლის მიზანია, გააჩუმოს და დასაჯოს განსხვავებული აზრი.

სამოქალაქო საზოგადოების ორგანიზაციები არა სახელმწიფოს მტრები, არამედ დემოკრატიული პლურალიზმისა და ანგარიშვალდებულების ხერხემალია. წლების მანძილზე საქართველოს ენერგიული სამოქალაქო საზოგადოება ქვეყნის ევროპული ინტეგრაციის მამოძრავებელი ძალა იყო, რომელსაც ხელშესახები სარგებელი მოჰქონდა თავისი მოქალაქეებისთვის. ამ ორგანიზაციების მიზანში ამოღება ფუნდამენტურ დემოკრატიულ ღირებულებებს ეწინააღმდეგება და ძირს უთხრის საბაზისო პრინციპებს, რომლებსაც კანდიდატი ქვეყნისგან მოელიან.

ევროკავშირი მყარად უდგას გვერდში საქართველოს გამძლე და მამაც სამოქალაქო საზოგადოებას, რომელიც მთავრობის მხრიდან მზარდი რეპრესიების მიუხედავად აგრძელებს მოქალაქეებისთვის მსახურებას”, - განაცხადა ჰიპერმა.

თბილისის საქალაქო სასამართლომ დააკმაყოფილა პროკურატურის შუამდგომლობა და 7 არასამთავრობო ორგანიზაციის საბანკო ანგარიშებს ყადაღა დაედო.

სასამართლოს გადაწყვეტილებით, დაყადაღებულია: „სამოქალაქო საზოგადოების ფონდი“-ს , „სამართლიანი არჩევნებისა და დემოკრატიის საერთაშორისო საზოგადოებ“-ის , „ინფორმაციის თავისუფლების განვითარების ინსტიტუტი“-ს, „დემოკრატიის მცველები“-ს , „საქართველოს დემოკრატიული ინიციატივა“-ს , „საფარი“-ს და „სოციალური სამართლიანობის ცენტრი“-ს საბანკო ანგარიშები.

მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.
ავტორის/ავტორების მიერ საინფორმაციო მასალაში გამოთქმული მოსაზრება შესაძლოა არ გამოხატავდეს "საქართველოს ღია საზოგადოების ფონდის" პოზიციას. შესაბამისად, ფონდი არ არის პასუხისმგებელი მასალის შინაარსზე.