ქუთაისიპოსტი

ქუთაისში, ძლიერი წვიმის შედეგად, საცხოვრებელი სახლების პირველი სართულები, ეზოები და სარდაფები დაიტბორა.
განსაკუთრებით რთული მდგომარეობაა წერეთლისა და ბუკიას ქუჩებზე, სადაც წყალმა ტექნიკა, ავეჯი და საყოფაცხოვრებო ნივთები დააზიანა.

ადგილობრივების განმარტებით, მათ მიერ განხორციელებული არაერთი ზარის მიუხედავად, დასახმარებლად არავინ მისულა და სტიქიით გამოწვეულ პრობლემებს, მთელი ღამის განმავლობაში, საკუთარი ძალებით უმკლავდებოდნენ.

„მოვარდა ღამის ოთხის ნახევარზე წყალი, წაგვლეკა, ტექნიკა, ყველაფერი გაფუჭებულია. 5-6-ჯერ მაინც დავრეკეთ 112-ში და ერთი მაშველიც არ გამოგვიგზავნეს“, - ამბობენ ადგილობრივები.



საგანგებო სიტუაციების მართვის სამსახურში განმარტავენ, რომ სახლების დატბორვასთან დაკავშირებით იმერეთის რეგიონებში, მათ შორის ქუთაისშიც, არაერთი შეტყობინებაა შესული და ცდილობენ რეაგირება დროულად მოახდინონ.

„ჩვენი ჯგუფები, ძირითადად, საცხოვრებელ სახლებში წყლის ამოტუმბვით სამუშაოებს ახორციელებენ. ბევრი შეტყობინებაა შემოსული, ვცდილობთ დროულად მოვახდინოთ რეაგირება და მაქსიმალურად დავეხმაროთ მოსახლეობას. გაგზავნილია თბილისის ჯგუფებიც“,- განმარტავენ უწყებაში.

ძლიერი წვიმის შედეგად, ქუთაისში, იუსტიციის სახლიც დაიტბორა. დაზიანებულია დაწესებულების ინფრასტრუქტურა, მოქალაქეებისთვის სერვისების მიწოდება დროებით შეფერხებულია. 

უხვმა ნალექმა პრობლემები ელექტროენერგიის მხრივაც შექმნა. ქალაქის მასშტაბით, რამდენიმე ქუჩას დენი ამ დრომდე არ მიეწოდება. 

ამასთან, ინტენსიური წვიმის გამო, გელათის ქუჩაზე მიწის მასა ჩამოიშალა, მიმდინარეობს გაწმენდითი სამუშაოები. 

ძლიერმა წვიმამ პრობლემები იმერეთის თითქმის ყველა მუნიციპალიტეტში შექმნა. 

გარემოს ეროვნული სააგენტოს ინფორმაციით, წვიმიანი და ქარიანი ამინდი საქართველოს ზოგიერთ რაიონში დღესაც შენარჩუნდება. ხვალიდან, 18 ივლისიდან, კი უმეტესად თბილი და უნალექო ამინდებია მოსალოდნელი.