ქუთაისიპოსტი

ეკონომიკის მინისტრი ლევან დავითაშვილი განმარტავს, რომ რუსეთთან პირდაპირი რეისების შესრულებასთან დაკავშირებით სამმა რუსულმა და ერთმა ქართულმა ავიაკომპანიამ მიმართათ.
მისივე თქმით, დოკუმენტებს შეისწავლიან და გადაწყვეტილებას, სავარაუდოდ, ხვალ მიიღებენ.

დავითაშვილი ამბობს, რომ მოთხოვნა არის როგორც თბილისის, ასევე ქუთაისისა და ბათუმის მიმართულებებზე.

„ჩვენ ვეფუძნებით ყველაზე უფრო მკაცრ მიდგომას, რომელსაც ის ქვეყნები იყენებენ, რომელთაც რუსეთთან ფრენები აქვთ. ეს არის რამდენიმე კრიტერიუმის მიხედვით მიღებული გადაწყვეტილება, რაც ითვალისწინებს, რომ არც სანქცირებული ბორტები და არც კომპანიები არ იქნებიან დაშვებულნი ამ ქვეყნის ბაზარზე. ევროკავშირს აქვს ე.წ. შავი სია, რომლებიც არიან სანქცირებული. ჩვენთვის მნიშვნელოვანია ფრენების უსაფრთხოება და ჩვენი გადაწყვეტილებები უნდა იყოს თანხვედრაში „იკაოს“ მოთხოვნებთან. ამიტომ, ბორტებს, რომლებსაც არ აქვთ წვდომა ტექნიკურ ინფორმაციაზე, კვალიფიციურ შეკეთებასა და სერვისზე, საქართველოს სივრცეში ვერ იფრენენ. ჩვენ, ყველა იმ კომპანიას და ბორტს, რომლებიც ამ მოთხოვნებს აკმაყოფილებენ, საშუალებას მივცემთ
ფრენები განახორციელონ.

დღეისთვის მოთხოვნა არის როგორც თბილისის, ისე ბათუმის და ქუთაისის მიმართულებებზე. ანუ, სამივე აეროპორტის მიმართულებით არის მოთხოვნა, როგორც ქართული ავიაკომპანიის, ისე რუსული ავიაკომპანიების. საზოგადოებაში ცალსახა განწყობები არ არის, განსხვავებული აზრებია. კონკრეტული ჯგუფების ღელვა გასაგებია, თუმცა მოსახლეობის დიდ ნაწილს შეიძლება, საკმაოდ დიდ შეღავათს აძლევდეს პირდაპირი ფრენები. ამას აქვს სოციალური მნიშვნელობა, რადგან ეთნიკურად ქართველები, რუსეთში მცხოვრები საქართველოს მოქალაქეები ვერ სარგებლობდნენ პირდაპირი მიმოსვლით. ეს მათ სოციალურ მდგომარეობას გააუმჯობესებს“, – განაცხადა მინისტრმა.

დღეიდან, 15 მაისიდან, ძალაში შევიდა პუტინის განკარგულება საქართველოსთან სავიზო რეჟიმის გაუქმების შესახებ.