ქუთაისიპოსტი

საქართველოს დაცულ ტერიტორიებზე შესვლა, სავარაუდოდ, პირველი ივნისიდან გაძვირდება.
შესაბამისი სახის შეტყობინებები ტურიზმის დარგის წარმომადგენლებს მიუვიდათ, რის შესახებაც გიდები და ტუროპერატორები სოციალურ ქსელში წერენ.

„სეზონის დასაწყისში, დღეს გვამცნეს რომ გაძვირდა: პრომეთე, კინჩხა, სათაფლია, ოკაცე, მარტვილის შესასვლელი ბილეთების ღირებულება. ერთხელ მაინც მოიფიქრონ და სანამ ტურპაკეტებს ავაწყობთ, მანამდე გაგვაფრთხილონ“, - წერს სასტუმროების მმართველი და ტურისტული კომპანიის დამფუძნებელი მაია მურაჩაშვილი.

მისივე ცნობით, ბილეთის საფასური 2-დან 5 ლარამდეა გაზრდილი. მათ შორის, პრომეთეს მღვიმეში შესვლის საფასური - 25 ლარი, მარტვილის კანიონზე კი - 20 ლარი გახდა.

ტურიზმის დარგის წარმომადგენლებისთვის გაგზავნილი შეტყობინების მიხედვით, როგორც საქართველოს, ასევე უცხო ქვეყნის მოქალაქეებს მარტვილის, ოკაცეს, კინჩხას, პრომეთეს, სათაფლიას და ნავენახევის ბილეთების ღირებულების გადახდა გაზრდილი ფასით მოუწევთ.

გავრცელებული ინფორმაციით, 6-დან 18 წლამდე მოზარდთა ბილეთების ღირებულებას ცვლილება არ შეეხება.