ქუთაისიპოსტი

"მოძალადე საკრებულოს თავმჯდომარე და მისი მოადგილე არ სჭირდება ქალაქს"

არასამთავრობო ორგანიზაცია "ევროპა ჩვენი სახლიას" წარმომადგენლები ქუთაისში საკრებულოს თავმჯდომარის დავით დვალისა და მისი მოადგილის ბექა ყანჩელის გადადგომას ითხოვენ.

როგორც ორგანიზაციის ხელმძღვანელი გია გოქაძე ამბობს, საკრებულოს თავმჯდომარისა და მისი მოადგილის მხრიდან მოქალაქის ცემის ფაქტი ამ დრომდე გამოუძიებელია, რის გამოც მათ თანამდებობაზე ყოფნის უფლება არა აქვთ.

"მოქალაქე სულხან ქობულაძეს გატაცებისა და ცემის ფაქტი, რომელიც მისივე თქმით განხორციელდა საკრებულოს თავმჯდომარისა და მისი მოადგილის მხრიდან, მესამე თვეა გამოუძიებელია. მოძალადე საკრებულოს თავმჯდომარე და მისი მოადგილე არ სჭირდება ქალაქს, რის გამოც ვითხოვთ, მათ თანამდებობიდან გადადგომას და საქმის დროულ გამოძიებას," –ამბობს გოქაძე.

საზოგადოებრივი ინტერესების დაცვის ცენტრის ხელმძღვანელმა სულხან ქობულაძემ, მიმდინარე წლის პირველ ოქტომბერს საკრებულოს თავმჯდომარე დავით დვალი და მისი მოადგილე ბექა ყანჩელი ცემასა და გატაცებაში დაადანაშაულა.

როგორც ქობულაძე ირწმუნება, ფიზიკურად მას შემდეგ გაუსწორდნენ, როცა სოციალურ ქსელში პოსტი გამოაქვეყნა, სადაც დავით დვალს ყვარყვარე უწოდა.
აღნიშნული ფაქტის შემდეგ, საქალაქო პოლიციამ გამოძიება დაიწყო, თუმცა გამოძიების დასრულებამდე საკრებულოს თავმდომარემ, დავით დვალმა უფლებამოსილება შეიწყვიტა.

გამოძიება ამ დრომდე არ დასრულებულა, თუმცა დვალმა თანამდებობრივი უფლებამოსილება ორთვიანი პაუზის შემდეგ აღიდგინა. მისი განმარტებით, საქმესთან დაკავშირებით მტკიცებულებების მოპოვება დასრულებულია.

საკრებულოს თავმჯდომარის პოსტზე აღდგენას კი დავით დვალი მომავლი წლის ქალაქის ბიუჯეტის პროექტს უკავშირებს.

"ევროპა ჩვენი სახლიას" მოთხოვნაზე ქუთაისის საკრებულოში კომენტარს არ აკეთებენ