ქუთაისში დაგეგმილი აქციის გამო ცენტრალური მოედანი ნაწილობრივ გადაიკეტა

12:16 / 28.02.2021

ქუთაისში, ცენტრალურ მოედანზე ნამახვანჰესის საწინააღმდეგო აქციისთვის ემზადებიან.

ნაწილობრივ შეზღუდულია საავტომობილო მოძრაობა ცენტრალურ ნაწილში, სადაც აქცია უნდა ჩატარდეს. ადგილზე მობილიზებული არიან სამართალდამცავებიც. რიონის ხეობიდან უკვე ჩამოვიდნენ აქციის ორგანიზატორები, რომლებიც აპარატურას ამოწმებენ და სხვა საორგანიზაციო საკითხებს აგვარებენ.

გიგანტური ჰესის მშენებლობის საწინააღმდეგო აქცია 13:00 საათზე დაიწყება.

რიონის ხეობაში 433მგვ. სიმძლავრის კასკადების მშენებლობას ადგილობრივები ოთხ თვეზე მეტია აპროტესტებენ. მათ გუშინ 126 - ე ღამე გაატარეს კარავში.

ადგილობრივები ჰესის პროექტს საფრთხის შემცველად მიიჩნევენ. მათი თქმით, ჰესი შეცვლის მიკროკლიმატს, გაქრება ყურძნის უნიკალური ჯიშები, წყლით დაიფარება მათი საცხოვრებელი სახლები, სახნავ-სათესი მიწები და წინაპართა საფლავები. ჰესის დაზიანების შემთხვევაში კი ადგილზე წარმოქმნილი 34 მეტრიანი ტალღა დაფარავს არამხოლოდ ხეობას, არამედ მიაღწევს ქუთაისამდე.

მოსახლეობის პროტესტის საპასუხოდ, კომპანიაში პროექტის სიკეთეებზე, გამომუშავებულ ელექტროენერგიაზე, დასაქმებულთა რაოდენობასა და ინვესტიციის მოცულობაზე საუბრობენ.მათი ინფორმაციით, წყალტუბოსა და ცაგერის მუნიციპალიტეტში, მდინარე რიონზე მშენებარე ნამახვანისა და ტვიშის ჰესები წლიურად 1,514 გეგავატი ენერგიას გამოიმუშავებენ. ჰესის ამოქმედების შემდეგ, "ენკა" ბიუჯეტში წლიურად 20 მილიონ ლარის შეტანისა და მშენებლობაზე 3 000-მდე ადამიანის დასაქმების პირობას დებს. კომპანიაში, საფრთხეებთან დაკავშირებით მოსახლეობის შიშებს არ იზიარებენ და ამბობენ, რომ უსაფრთხოების ყველა ზომა დაცულია.