ზესტაფონში, ტყიბულში, თერჯოლასა და ბაღდათში საარჩევნო უბნებთან 45 ათასზე მეტი ამომრჩეველი მივიდა

20:47 / 21.11.2020

20:00 საათის მონაცემებით, 21-ე ზესტაფონის, ტყიბულის, თერჯოლისა და ბაღდათის გაერთიანებულ ოლქში, 45 ათას 200-ზე მეტი ამომრჩეველი საარჩევნო ყუთთან მივიდა.

ეს ამომრჩეველთა საერთო რაოდენობის 35,5% -ია.

გაერთიანებული ოლქის მონაცემების შესახებ საერთო კომენტარი ზესტაფონში გააკეთეს. აქ საოლქო საარჩევნო კომისიაში განაცხადეს, რომ 21-ე სამაჟორიტარო ოლქში დარღვევები არ დაფიქსირებულა. 2016 წლის საპარლამენტო არჩევნების მეორე ტურთან შედარებით, ამომრჩევლის აქტივობა დაბალი იყო.

,,არჩევნებში მონაწილეობა მიიღო 45 ათას 200-ზე მეტმა ამომრჩეველმა. ეს არის საერთო რაოდენობის 35,5 პროცენტი. რაც შეეხება დარღევევებს და საჩივრებს, არ დაფიქსირებულა",- განაცხადა ზესტაფონის საოლქო საარჩევნო კომისიის თავმჯდომარემ გიორგი კახნიაშვილმა.

უბნები უკვე დახურულია და ხმის დათვლის პროცედურები მიმდინარეობს. მეორე ტურისთვის 21-ე სამაჟორიტარო ოლქში გახსნილი იყო 157 უბანი, რეგისტრირებული იყო 131 ათას 151 ამომრჩეველი.

ზესტაფონის, ტყიბულის, თერჯოლისა და ბაღდათის მაჟორიტარი დეპუტატობის მსურველი ,,ქართული ოცნებიდან" ბეჟან წაქაძე და ,,ნაციონალური მოძრაობიდან" კახა გეწაძეა.

ოპოზიციამ მეორე ტურში მონაწილეობაზე უარი თქვა, თუმცა მათი კანდიდატების მონაცემები ბიულეტენებში მაინც იყო შეტანილი.

პირველ ტურში ბეჟან წაქაძემ ხმების 49, 77 % მიიღო, ხოლო კახა გეწაძემ 26, 99 %.