იმ შემთხვევაში თუ ნანა კოსტავამ დეპუტატის მანდატზე უარი თქვა, ქუთაისის საკრებულოში მის ადგილს მერიის ააიპ „სპორტულ დაწესებულებათა გაერთიანების“ ხელმძღვანელი, კობა ფხაკაძე დაიკავებს.
2017 წლის ადგილობრივი თვითმმართველობის არჩევნების დროს ფხაკაძეს „ქართული ოცნების“ პროპორციულ სიაში რიგით მე-10 ადგილი ეჭირა, შესაბამისად, დეპუტატის მანდატი სწორედ მას ერგება.
„ჯერ უნდა დაველოდოთ ქალბატონი ნანას გადაწყვეტილებას. როდესაც მივალთ ამ მდგომაროებამდე, ქალაქის მერთან გავივლი კონსულტაციას და მივიღებ გადაწყვეტილებას. ჯერ ამაზე არ მისაუბრია და ვერ გაგცემთ პასუხს“, - ამბობს კობა ფხაკაძე.
ნანა კოსტავამ მას შემდეგ, რაც მის მიერ სოციალურ ქსელში
გამოქვეყნებულ პოსტს საზოგადოების მწვავე რეაქცია მოყვა, განაცხადა,
რომ დეპუტატის მანდატს დატოვებდა. კოსტავას, უფლებამოსილების
შეჩერების თხოვნით საკრებულოსთვის წერილობით დღეს უნდა მიემართა,
თუმცა, იგი არც სამსახურში გამოჩენილა და არც სატელეფონო ზარებს
პასუხობს. ტელეკომპანია "იმედს" კი განუცხადა, რომ ამომრჩევლების
თხოვნით საკრებულოს დატოვება გადაიფიქრა.
დღესვე საკრებულოს თავმჯდომარემ, ნიკა ლატარიამ განაცხადა, რომ თუ
კოსტავა საკრებულოს არ დატოვებს, ის თავად გავა ფრაქცია "ქართული
ოცნება -კოსერვატორებიდან", რომლის წევრიც ნანა კოსტავასთან ერთად
არის.
ნანა კოსტავამ 28 მაისს ფეისბუქის პირად გვერდზე ჟურნალისტის სალომე
ბარკერის ვიდეო გააზიარა წაწერით : "კაი დღეში ხარ ახლა, იცინე ".
სალომე ბარკერი რამდენიმე დღის წინ ლაგოდეხში ექსკურსიაზე დაღუპული 16
წლის გოგონას დაა, ვიდეოში კი ბარკერი თითზე გაკეთებული პრეზერვატივით
ჯვარს გამოსახავს.
ნანა კოსტავას პოსტს საზოგადოების უმწვავესი რეაქცია მოყვა. ორი დღის განმავლობაში ქალაქში რამდენიმე საპროტესტო აქცია გაიმართა. აქციის მონაწილეები კოსტავას საკრებულოდან წასვლას ითხოვდნენ.
კოსტავას ქმედება დაგმეს მისმა თანაგუნდელებმა. მას ერთდროულად დაატოვებინეს ფრაქცია "ქართული ოცნება -კონსერვატორების " თავმჯდომარის პოსტი და გენდერული საბჭო.
საკრებულოს თავმჯდომარემ, ნიკა ლატარიამ კი განაცხადა, რომ იგი კოსტავასთან ერთად საკრებულოში არ იმუშავებს.
მასალის გამოყენების პირობები