ქუთაისიპოსტი

ქუთაისის "ტორპედოს" სტადიონზე დაგეგმილი სარეაბილიტაციო სამუშაოებისთვის პროექტირება დაწყებულია.
სტადიონზე სრულად უნდა შეიცვალოს მოედნის საფარი, გარემონტდეს გასახდელები, მოწესრიგდეს სველი წერტილები. დაგეგმილია VIP ლოჟის გაფართოება, პრეს ლოჟისთვის კი დამოუკიდებელი შესასვლელის მოწყობა.

რა თანხა დაიხარჯება რეაბილიტაციისთვის, ზუსტი ციფრი ჯერჯერობით უცნობია, თუმცა, ცნობილია, რომ სტადიონის რეაბილიტაციის ხარჯებს, რაც დაახლოებით 700 000 - 800 000 ლარია, ფეხბურთის ფედერაცია დაფარავს, ხოლო, დარჩენილ სამუშაოებს ქუთაისის მერია დააფინანსებს (სავარაუდოდ, 500 000 ლარამდე).

სტადიონის დირექტორის, თამაზ კიკვაძის თქმით, რეაბილიტაციის პროექტზე მუშაობა უკვე დაწყებულია.

"მთლიანად უნდა შეიცვალოს მოედანი. არამხოლოდ ბალახის საფარი, არამედ, ნიადაგიც. გრუნდატმდე უნდა დავიდეს სამუშაოები. ამას რამდენიმე თვე დასჭირდება, რომ მასზე თამაში იყოს შესაძლებელი. ახალ სეზონს გუნდი ქუთაისში ვერ დაიწყებს, მაგრამ თუ გეგმის მიხედვით წავალთ, სამუშაოები ივნისში უკვე დასრულებული იქნება და ევროტურნირს მზად შევხვდებით",- ამბობს შპს რამაზ შენგელიას სახელობის სტადიონის დირექტორი, თამაზ კიკვაძე.

რეაბილიტაციის დასრულებამდე "ტორპედო" კალენდარულ მატჩებს წყალტუბოს მოედანზე ჩაატარებს.

"ტორპედოს" სტადიონს რეკონსტრუქცია ბოლოს  2010 წელს, ინვესტორმა  კომპანია "ვისოლ ჯგუფმა" ჩაუტარა.  სტადიონზე დამონტაჟდა 14 700 ინდივიდუალური სკამი, საერთაშორისო სტანდარტების ტაბლო და განათების სისტემა, თავიდან აშენდა ადმინისტრაციული შენობა, გადაიხურა სტადიონის მნიშვნელოვანი ნაწილი, გარემონტდა გასახდელები და პრესლოჟა.

2017 წელს კლუბი ქუთაისის მერიამ აუქციონზე 300 000 ლარად გაყიდა. სტადიონი კი საკუთრებაში დაიტოვა, რომლის შენახვის ხარჯებსაც თავად აფინანსებს.