ქუთაისიპოსტი

ქუთაისის საოლქო საარჩევნო კომისიამ შემაჯამებელი ოქმი უკვე შეადგინა, რაც იმას ნიშნავს, რომ ქუთაისის ახალი, მერვე მოწვევის საკრებულო ფუნქციონირებას ერთი თვის ვადაში დაიწყებს.

საარჩევნო კოდექსის 151-ე მუხლის თანახმად, ცესკო არჩევნების საბოლოო შედეგების შეჯამებიდან 30 დღის ვადაში იწვევს საკრებულოს პირველ სხდომას. სწორედ ამ სხდომის შემდეგ შეუდგებიან ახლადარჩეული დეპუტატები მუშაობას.

2025 წლის ადგილობრივი თვითმმართველობის არჩევნების შედეგად, ქუთაისის წარმომადგენლობითი ორგანო 25 დეპუტატით დაკომპლექტდა. აქედან, 22 დეპუტატი "ქართულ ოცნებას", თითო-თითო დეპუტატი კი ბარიერგადალახულ ოპოზიციას ეყოლება, რადგან 4 ოქტომბრის არჩევნებზე ხმების 77.55% (36 047 ხმა) "ქართულმა ოცნებამ" მიიღო; 5.7% (2 661 ხმა) - პარტია "გირჩმა"; 5.7% (2659 ხმა ) - პარტია "ლელომ"; 4.5% (2114 ხმა) კი - პარტიამ "გახარია საქართველოსთვის" მიიღო.

ადგილობრივ თვითმმართველობის არჩევნებზე, ქუთაისში, პარტიული სია 8 პარტიას ჰქონდა წარმოდგენილი.

4 ოქტომბერს საქართველოში ადგილობრივი თვითმმართველობის არჩევნები ჩატარდა, რომელსაც პოლიტიკური  პარტიების ნაწილმა  ბოიკოტი გამოუცხადა. 

საქართველოს მოქალაქეები 64 მერს და 64 საკრებულოს 2 058 წევრს ირჩევდნენ.

ქვეყნის მასშტაბით, ამომრჩეველთა საერთო რაოდენობამ 3 513 818 შეადგინა, სულ გახსნილი იყო 3 061 საარჩევნო უბანი.