ქუთაისიპოსტი

"ქართულმა ოცნებამ" დღეს საარჩევნო კამპანია გახსნა და ადგილობრივ თვითმმართველობის არჩევნებში, თბილისის მერობის კანდიდატად კახა კალაძე ოფიციალურად წარადგინა.

მერობის კანდიდატის წარდგენის ღონისძიება, რომელსაც "ოცნების“ საპატიო თავმჯდომარე ბიძინა ივანიშვილიც დაესწრო, მთაწმინდის პარკში გაიმართა.

კალაძე დედაქალაქის მერობის კანდიდატად, „ოცნების“ გუნდის სახელით, პრემიერ-მინისტრმა, ირაკლი კობახიძემ წარადგინა.

"მაქვს პატივი საქართველოს დედაქალაქის მერობის კანდიდატად, უფრო სწორად, მომავალ მერად წარმოგიდგინოთ ადამიანი, რომელსაც მერად ნებისმიერი ევროპული დედაქალაქი ინატრებდა. ეს არის ჩვენი გუნდის გამორჩეული ლიდერი, თბილისის ყველა დროის ყველაზე წარმატებული მერი – კახა კალაძე“, – განაცხადა ირაკლი კობახიძემ.

მისივე განცხადებით, მუნიციპალიტეტებში მერობის კანდიდატების წარდგენა უახლოეს პერიოდში მოხდება.

როგორც ირაკლი კობახიძემ აღნიშნა, „ქართულ ოცნებას“ ორ-სამ მუნიციპალიტეტზე დარჩა პოზიციები შესაჯერებელი.

„ როგორც კი შევჯერდებით ამ ორ-სამ შემთხვევაზე, მაშინვე წარვადგენთ უკვე ერთიან სიას. ეს ეხება როგორც მუნიციპალიტეტის მერებს, 63 კანდიდატს რეგიონებში, ასევე ეხება თბილისის საკრებულოსა და ყველა საკრებულოს სიას“, – განაცხადა ირაკლი კობახიძემ.

საქართველოს ადგილობრივი თვითმმართველობის არჩევნები მიმდინარე წლის 4 ოქტომბერს ჩატარდება.