პოლიტიკა
"რა დროს კეტჩუპი და ფქვილია? ეს სირცხვილია" - პრეზიდენტი ოპოზიციას
14:02 / 14.03.2022
საქართველოს პრეზიდენტის სალომე
ზურაბიშვილის განცხადებით, ხელისუფლებასთან ერთად, ოპოზიციაც სცოდავს,
როცა ცდილობს ქვეყნის გარეთ გააშავოს საქართველოს
სახელი.
სალომე ზურაბიშვილის თქმით, ასეთი
განცხადებებით ოპოზიცია არ ან ვერ ელევა პოლიტიკურ პროვოკაციებს და
ამით ქვეყანას საფრთხეს უქმნის.
"ოპოზიცია სცოდავს, როცა
ბრიუსელში, კიევში თუ ამერიკაში აქვს მცდელობები, რომ საქართველოს
სახელი და სახე გააშავოს და ქვეყანა ისე წარმოაჩინოს, რომ ვითომ შიში
ვამჯობინეთ ღირსებას, თითქოს, ღირსი არ ვართ არც ევროკავშირში
გაწევრიანების, არც ნატოსთან და ამერიკასთან პარტნიორობის, ან კიდევ
უარესი - როცა ამტკიცებს, რომ მთავრობამ, მაშასადამე ქვეყანამ,
შეცვალა პროდასავლური კურსი. ეს ხომ ქვეყნის და შენი ხალხის
შეურაცხყოფაა? როცა ვაშინგტონში შენს ქვეყანას ესოდენ ბრალს უყენებ და
შენივე ქვეყანა შენგან მასპინძლის დასაცავი ხდება. ასეთი პოლიტიკურად
მოტივირებული თავდასხმა ხომ მხოლოდ მთავრობას არ აზიანებს, არამედ
ქვეყანას და მტრის საქმეს აკეთებს", - განაცხადა პრეზიდენტმა
საპარლამენტო ტრიბუნიდან.
მან გასულ დღეებში თბილისში
გამართულ აქციებზეც ისაუბრა, სადაც აქტივისტებმა პოლიციელებს ფქვილი
შეაყარეს, პარტია "დროას" ლიდერმა ელენე ხოშტარიამ კი კანცელარიის
შენობას კეტჩუპი შეასხა. მისი თქმით, პოლიციელების შეურაცხყოფა
დაუშვებელია.
"ოპოზიცია სცოდავს, როცა
შეურაცხყოფას აყენებს პოლიციას და პოლიციელებს. ეს არის ინსტიტუტი,
რომელსაც ქვეყნის სტაბილურობისა და უსაფრთხოებისათვის განსაკუთრებული
პასუხისმგებლობა აკისრია. მით უმეტეს, ამ უაღრესად დაძაბულ პერიოდში.
მათ მიმართ პატივისცემა და მხარდაჭერა ყველას გვევალება და პირველ
რიგში, ვინც ხალხის არჩეულია! რა დროს კეტჩუპი და ფქვილია? ეს
სირცხვილია", - განაცხადა სალომე ზურაბიშვილმა.
მან ოპოზიცია, პროვოკაციების გზით,
მთავრობის შერყევის მცდელობაშიც დაადანაშაულა.
"ოპოზიცია სცოდავს, როცა
რადიკალურ ზომებზე აპელირებს და ამით ცდილობს მთავრობის შერყევას, ანუ
შექმნილი საერთაშორისო ვითარების გამოყენებით, საკუთარი პოლიტიკური
დღის წესრიგის მიღწევას. ამ დროს კი, ქვეყანას აყენებს ჩიხურ
მდგომარეობაში და შესაძლოა, საფრთხის ქვეშ, ისე რომ ამის
პასუხისმგებლობას საკუთარ თავზე არ იღებს. გაერთიანებაზე სიტყვიერად
აპელირებს და რეალურად, პოლიტიკური ნიშნის მოგებას და პროვოკაციებს არ
თუ ვერ ელევა", - განაცხადა სალომე
ზურაბიშვილმა.
სალომე ზურაბიშვილი დღეს
პარლამენტში წლიური ანგარიშით წარსდგა. მას საკანონმდებლო ორგანოში
ჯერ კიდევ 5 მარტს უნდოდა მისვლა, თუმცა, უმრავლესობამ სხდომა არ
ჩანიშნა.
პრეზიდენტი საკანონმდებლო ორგანოში
უკრაინის დროებით წარმომადგენელთან ანდრეი კასიანოვთან ერთად მივიდა.
მას მხედველობიდან არც საქართველოს ელჩის უკრაინაში გაწვევის საკითხი
გამორჩენია და უკრაინის პრეზიდენტს ვოლოდიმირ ზელენსკის დიპლომატის
უკან დაბრუნება სთხოვა.
მსგავსი სიახლეები
17:29 / 22.04.2024
ქუთაისელი სამოქალაქო აქტივისტი, რომელიც პოლიციამ
მესხიშვილის თეატრთან დააკავა, თავისუფალია.
17:19 / 22.04.2024
„ოჯახურ ღირებულებათა და არასრულწლოვანთა დაცვის შესახებ“
კონსტიტუციურ კანონპროექტთან დაკავშირებით პირველი საყოველთაო-სახალხო
განხილვა ქუთაისში შედგა.
ეკონომიკის სიახლეები
მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.
ავტორის/ავტორების მიერ საინფორმაციო მასალაში გამოთქმული მოსაზრება შესაძლოა არ გამოხატავდეს "საქართველოს ღია საზოგადოების ფონდის" პოზიციას. შესაბამისად, ფონდი არ არის პასუხისმგებელი მასალის შინაარსზე.
მასალის გამოყენების პირობები