ქუთაისში პარლამენტის ყოფილი შენობის დაკონსერვების სამუშაოები დაიწყო.
ამ ინფორმაციას ადასტურებენ საქართევლოს პარლამენტში.
პრესსამსახურის ინფორმაციით, შენობაში ქონების აღწერა
მიმდინარეობს, რომელსაც ქონების მართვის სააგენტოს წარმომადგენლები
აწარმოებენ.
აღწერის დასრულების შემდეგ
მონაცემები ეკონომიკის სამინისტროს გადაეცემა, რის შემდეგაც უწყება
შენობას დაკონსერვებულად გამოაცხადებს.
„ჩვეულებრივად ვმუშაობთ. ჯერჯერობით არაფერი იგეგმება. სხვას ვერაფერს
გეტყვით“, - განუცხადეს ქუთაისიპოსტს დაცვის
თანამშრომლებმა.
ქუთაისში პარლამენტის შენობის კონსერვაციის ფაქტს აპროტესტებენ
მოძრაობა „დატოვე პარლამენტი ქუთაისში“ აქტივისტები. მათი
შეფასებით, „პარლამენტის
შენობის დაკონსერვება ეს არის ხედვების და აზროვნების
დაკონსერვება“.
მოძრაობის ერთ ერთი აქტივისტის მაკა ხეცურიანის თქმით, ამ აქტით, პარლამენტთან ერთად ქუთაისიც „დააკონსერვეს“.
მოძრაობა "დატოვე პარლამენტი ქუთაისში" აქტივისტი ეკა ფხაკაძე მიუთითებს, რომ ბიძინა ივანიშვილმა არა მარტო პროპორციული საარჩევნო სისტემის შეპირების არშესრულებით „გადააგდო“ ამომრჩევლები, მანამდე ქუთაისში პარლამეტის დატოვების დაპირებაც არ შეასრულა.
„დაკონსერვებული აზროვნების ხელისუფლებაა. არანაირი სამომავლო ხედვა არა აქვთ და საერთოდ, ამ წარსულის აჩრდილებთან და შენობებთან ბრძოლას ეწირება ქვეყნის განვითარება, ქუთაისის განვითარება და ბევრი ადამიანის ბედიც“, - ამბობს ეკა ფხაკაძე.
„დატოვე პარლამენტი ქუთაისში“ წევრების თქმით, მოძრაობა არ განიხილავს არანაირ სხვა ალტერნატივას ამ შენობისთვის და სხვა სტატუსს ქუთაისისთვის.
თუმცა, ხელისუფლება ამ საკითხს
სხვაგვარად ხედავს.
ბოლო ინფორმაციით, პარლამენტის შენობაში განთავსდება პოლიციის
რამდენიმე სტრუქტურა - "112", საპატრულო პოლიციის მომსახურების
ერთიანი ცენტრი, შინაგან საქმეთა სამინისტროს აკადემიის რეგიონული
ცენტრი და მომსახურების სააგენტო.
ქუთაისში არსებულ პარლამენტის შენობაში სხდომები და სესიები უკვე ერთი
წელია აღარ ტარდება.
2019 წლის იანვრიდან პარლამენტი მთლიანად თბილისში გადავიდა.
საკანონმდებლო ორგანოს
ქუთაისიდან თბილისში დაბრუნებაზე მსჯელობა „ქართული ოცნების“
ხელისუფლებაში მოსვლისთანავე, 2012 წლიდან დაიწყო.
პარლამენტის ადგილსამყოფელის შესახებ ცვლილება კონსტიტუციაშიც შევიდა.
2017 წელს მიღებულ ახალ კონსტიტუციაში, პარლამენტის ადგილსამყოფელი
მითითებული აღარ არის.
ქუთაისში პარლამენტის შენობის მშენებლობაზე 340 მლნ ლარზე მეტი დაიხარჯა. თუმცა, დანახარჯები საკანონმდებლო ორგანოს თბილისში გადატანის შემდეგაც მასშტაბურია.
პარლამენტის აპარატის მიერ BM.GE-ისთვის მიწოდებული ინფორმაციის
თანახმად, საქართველოს პარლამენტის ბიუჯეტს 2019 წლის პირველ სამ
თვეში ქუთაისში საკანონმდებლო ორგანოს ყოფილი შენობის შენახვა, ჯამში,
332,109 ლარი დაუჯდა.
იანვარ-მარტში პარლამენტის ელექტროენერგიის გადასახადი 181,574 ლარი
იყო, წყლის - 64,949 ლარი, ბუნებრივი აირის კი - 85,586 ლარი, თუმცა
უნდა აღინიშნოს, რომ 2018 წლის დეკემბერში ელექტროენერგიის, წყლის და
ბუნებრივი აირის ხარჯი გადახდილია 2019 წლის იანვარში.
საქართველოს პარლამენტის ბიუჯეტს ქუთაისის შენობის შენახვა 2018 წელს
1,260,558 ლარი დაუჯდა, 2017 წელს - 1,091,295 ლარი, 2016 წელს
კი - 688,848 ლარი.
მასალის გამოყენების პირობები