ქუთაისიპოსტი

განათლების სამინისტროს ინფორმაციით, დღეს, 20 მაისს, 09:00 საათიდან, პირველკლასელთა რეგისტრაცია დაიწყო. 

13 ივნისის ჩათვლით მშობლებს შესაძლებლობა აქვთ, შვილები მათთვის სასურველ სკოლაში, განათლების მართვის საინფორმაციო სისტემის ოფიციალურ ვებგვერდზე დაარეგისტრირონ.

''ბავშვის სისტემაში რეგისტრაციას უზრუნველყოფს მშობელი ან კანონიერი წარმომადგენელი. ელექტრონულად რეგისტრირებული მოსწავლის ჩასარიცხად აუცილებელი დოკუმენტაციის წარდგენა სკოლებში 14 ივნისიდან 25 ივნისის ჩათვლით განხორციელდება. დადგენილ ვადებში დოკუმენტაციის წარუდგენლობის შემთხვევაში, რეგისტრაცია ავტომატურად გაუქმდება.

პირველ კლასში ჩასარიცხი დოკუმენტები: მოსწავლის კანონიერი წარმომადგენლის განცხადება, რომელიც უნდა შეიცავდეს კანონიერი წარმომადგენლის საცხოვრებელი ადგილისა და ტელეფონის ნომრის თაობაზე ინფორმაციას და უნდა აკმაყოფილებდეს საქართველოს ზოგადი ადმინისტრაციული კოდექსის 78-ე მუხლით დადგენილ სხვა მოთხოვნებს, კანონიერი წარმომადგენლის პირადობის დამადასტურებელი მოწმობის ასლი და საქართველოში ბინადრობის დამადასტურებელი დოკუმენტის ასლი (ასეთის არსებობის შემთხვევაში). დოკუმენტების უცხოურ ენაზე წარდგენის შემთხვევაში, მათ უნდა დაერთოს საქართველოს კანონმდებლობით დადგენილი წესით შესრულებული თარგმანი ქართულ ენაზე).

მოსწავლის დაბადების მოწმობის ან პირადობის დამადასტურებელი დოკუმენტის ასლი და საქართველოში ბინადრობის დამადასტურებელი დოკუმენტის ასლი (ასეთის არსებობის შემთხვევაში). დოკუმენტების უცხოურ ენაზე წარდგენის შემთხვევაში, მათ უნდა დაერთოს საქართველოს კანონმდებლობით დადგენილი წესით შესრულებული თარგმანი ქართულ ენაზე).

პირველ კლასებში არსებული ადგილების რაოდენობის შესახებ ინფორმაციის ნახვა მოქალაქეებს შემდეგ ბმულზე შეუძლიათ: https://skolebi.emis.ge/.  პირველკლასელთა საყოველთაო რეგისტრაციის ინსტრუქციის ნახვა კი შესაძლებელია აქ",- ნათქვამია განათლების და მეცნიერების სამინისტროს მიერ გავრცელებულ ინფორმაციაში.

„ზოგადი განათლების შესახებ“ საქართველოს კანონში ცვლილებების მიხედვით, 2024-2025 სასწავლო წელს, პირველ კლასში დარეგისტრირებას შეძლებენ ბავშვები, რომლებსაც 6 წელი 1-ელ დეკემბრამდე შეუსრულდებათ.