ქუთაისიპოსტი

ქუთაისის ახალ ინფექციურ საავადმყოფოში პაციენტები გუშინ, გვიან ღამით, საკარანტინო სივრციდან შეიყვანეს.
ისინი კორონავირუსით დაინფიცირებული იმ ტრაილერის მძღოლის ოჯახის წევრები არიან, რომელიც გარდაბნიდან რამდენიმე დღის წინ ასევე ქუთაისში გადმოიყვანეს.

კლინიკაში მკურნალობას ამ დროისათვის 12 პაციენტი აგრძელებს. ქუთაისის ახალ ინფექციურ საავადმყოფოს ვირუსისგან განკურნებული 67 პაციენტი ჰყავს.

დღეს საქართველოში კორონავირუსის 34 ახალი შემთხვევა გამოვლინდა და ინფიცირებულთა რაოდენობა 1684 გახდა.  გამოჯანმრთელებულთა საერთო რაოდენობა 5-ით გაიზარდა და ჯამში 1315 -ს შეადგენს.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.