ქუთაისიპოსტი

ქუთაისის ქუჩებში მიუსაფარი ძაღლების რაოდენობა დღითიდღე იზრდება, რის გამოც მოქალაქეებისთვის გადაადგილება საფრთხის შემცვლელია.

უმეთვალყურეოდ დარჩენილი ცხოველების მოვლა-პატრონობაზე პასუხისმგებელ ორგანიზაციაში პრობლემას აღიქვამენ, თუმცა მისი მოგვარების ერთადერთ გამოსავლად საკითხის საკანონმდებლო დონეზე გადაწყვეტას ხედავენ. 

შესაბამისი კანონის მიღებამდე, რომელიც ჯერ მხოლოდ იდეის დონეზეა, მოქალაქეებს თავად მოუწევთ ქუჩებში მომრავლებული ძაღლების მოგერიება. 

"დილაობით ვარჯიში მინდა, თუმცა მომრავლებული ძაღლების გამო გამოსვლას ვერ ვახერხებ, ძალიან აგრესიულები არიან. განსაკუთრებით ბევრი მხვდება მეორმოცე სკოლასთან", - ამბობს ნიკეას ქუჩაზე მცხოვრები გივი დვალიშვილი. 

"ქუჩის ძაღლმა ლამის შემიჭამა შვილი. გადაადგილებისაც გვეშინია, თუ ჯგუფურად არიან თავმოყრილნი. ისინი იმსახურებენ სათანადო ყურადღებას, მაგრამ ჩვენც დაცულად უნდა ვგრძნობდეთ თავს. ზოგი ძაღლი სამკურნალოა, ზოგს ცოფი აქვს, ზოგიც უმიზეზოდ გეცემა უკნიდან. სახელმწიფოსგან აუცილებლად უნდა მოვითხოვოთ რეაგირება, მიხედონ ცხოველთა თავშესაფრებს და წაიყვანონ, ძალიან მომრავლდნენ“. 



ქალაქში უმეთვალყურეოდ დარჩენილ ცხოველებზე, მათ შორის ძაღლებზე, პასუხისმგებელი მერიის დაქვემდებარებაში მყოფი ა(ა)იპ "სპეციალური სერვისებია". ორგანიზაციაში ამბობენ, რომ მიუსაფარ ცხოველებს, კანონის შესაბამისად, მხოლოდ 10 დღე აჩერებენ და ყველა სამედიცინო მომსახურებით უზრუნველყოფენ. ამის შემდგომ კი, თუ ძაღლს მეპატრონე არ გამოუჩნდა და სერვისებმაც მისი გასხვისება ვერ მოახერხა, ისევ ქუჩაში ბრუნდება.

„ჩვენ მაქსიმალურად ვცდილობთ გავაშვილოთ ცუგები, თუმცა, მაინც ბევრია ისეთი შემთხვევა, როცა ცუგა უბრუნდება თავისუფალ გარემოს. როგორც ვიცი, პარლამენტმა პირველი მოსმენით უკვე მიიღო კანონი, რითაც ხდება საყოველთაო აღწერა საკუთრებაში მყოფი შინაური ცხოველების, განსაკუთრებით ძაღლების. ანუ კანონი გაამკაცრებს კონტროლს, რომ მეპატრონემ ქუჩაში ვერ დატოვოს ცუგა და ვერ გახდეს ის მსხვერპლი ვინმესთვის. კანონი გულისხმობს ჯარიმებს, დასანქცირებას, გამრავლების წესს და ა.შ. თუ ეს ყველაფერი კანონმდებლობით არ დარეგულირდა, მარტო მუნიციპალური თავშესაფრის დონეზე ეს საკითხი ვერ გადაწყდება. დაახლოებით 2024 წლისთვის ეს, ალბათ, ძალაში უნდა იყოს შესული. ეს რეგულაციები რომ ამუშავდება, გვექნება თვალშისაცემი შედეგი“, - ამბობს ა(ა)იპ "სპეციალური სერვისების" წარმომადგენელი გიორგი მჟავანაძე. 

საკითხის გადაწყვეტას სხვაგვარად ხედავს ცხოველთა დაცვის ფედერაციის თავმჯდომარე თემურ ლაჭყეპიანი, რომელიც ქუთაისის მერიას ცხოველების პოპულაციის მართვის გადაბარებას სთავაზობს. მისი თქმით, ამ წინადადებით ადგილობრივ თვითმმართველობას რამდენჯერმე მიმართა, თუმცა უშედეგოდ. მისი თქმით, სწორედ რომ ცხოველთა პოპულაციის არასწორი მართვის შედეგია ქუთაისის ქუჩებში აღურიცხავი, არაიდენტიფიცირებული, არასტერილიზებული და არაკასტრირებული ძაღლების მომატებული რიცხვი.

"შევთავაზეთ სხვადასხვა ინოვაციური პროგრამების განხორციელება და თანამედროვე მეთოდების დანერგვა, რომ ჩვენ აგვეღო პასუხისმგებლობა ქუთაისის მასშტაბით ცხოველების პოპულაციის მართვაზე, იქნებოდა ჩართულობა მოხალისეების, საერთაშორისო ვეტერინარების და ა.შ, თუმცა პასუხი ვერ მივიღეთ. ჩვენს თავზე რომ აგვეღო პოპულაციის მართვა, ამით თანხაც დაიზოგებოდა, რადგან თანადაფინანსებაზეა საუბარი (იყო გარკვეული შემოთავაზებები დონორებისაგან). ამასთან, ჩვენი მუშაობა გაცილებით ეფექტური იქნებოდა, ვიდრე მუნიციპალურის დაქვემდებარებაში მყოფი ა(ა)იპის, რომელიც მრავალპროფილურია. ჩვენ ვთანამშრომლობთ სხვადასხვა ორგანიზაციასთან, გვყავს სხვადასხვა ქალაქში მოხალისეები. შეგვიძლია, ლეკვების დაბინავების, ძაღლების გასხვისების და სხვა პროგრამები ავამუშაოთ და ა.შ. სამწუხაროა, რომ მერიისგან გვეცნობა, ამ მომენტისთვის თქვენი წინადადება ვერ იქნება განხილულიო“,- ამბობს თემურ ლაჭყეპიანი.

რამდენი მიუსაფარი ძაღლი დადის ქუთაისის ქუჩებში ეს უცნობია, ვინაიდან „სპეციალურ სერვისებში“ ეს არ იციან.  

ფოტო: დეა მანაგაძე