საზოგადოება
ტრაგედიად ქცეული სიდუხჭირე
FaceBook
ხის ძველთაძველ ორსართულიან სახლში ერთი წლის როსტომი, 5 წლის თიკო, 6 წლის ტარიელი, 8 წლის გენადი, მათი ორსული დედა და ბებია ხანძარს სამ თებერვალს ემსხვერპლნენ.

ბაღდათის ცენტრში, წერეთლის ქუჩაზე მდებარე მიტოვებულ სახლში, სადაც არც დენი იყო და არც გაზი, ოჯახი ერთი კვირაა რაც შესახლდა და დარჩენას მარტის შუა რიცხვებამდე აპირებდა.

"ჩვენთვის უცნობია, თუ რატომ მოხვდნენ ამ სახლში. ეს სახლი კერძო საკუთრება გახლავთ, რომელიც ათწლეულებია მიტოვებულია, მაგრამ ჩვენთვის არავის მოუმართავს პრეტენზიით, რომ მათ ქონებაში ვინმე შეჭრილიყო უკანონოდ", - ამბობს ბაღდათის მერი, არჩილ გოგსაძე.

ოჯახის მეზობელი, ზიტა ქამუცაძე ყვება, რომ სახლში გარდაცვლილი ქალის დედა და ძმა ცხოვრობდა, ნარგიზი შვილებთან ერთად კი იქ დროებით გადავიდა. "თავისი სახლიდან რამდენიმე დღის წინ ძმა გაასვენეს და ბინაში ყოფნის შიში დასჩემდა".

ოჯახი სოციელურად დაუცველი იყო და სახელმწიფოსგან შემწეობას იღებდა. ოქტომბერსა და ნოემბერში სოციალური დახმარება შეჩერებული ჰქონდათ, როგორც სოციალური მომსახურების სააგენტოში გვითხრეს, გეგმიური გადამოწმების მიზნით. დეკემბერში ოჯახს შემწეობა აღუდგა და გასული ორი თვის თანხა, 1360, თვეში 680-680, ლარიც ჩაერიცხა. Მეზობლები იხსენებენ, რომ მათ უკიდურესად უჭირდათ.

"შეშაც არ ჰქონდათ, საჭმელიც. სასადილოში იღებდნენ საკვებს".

ოჯახის არცერთი წევრი მუშაობდა. ბავშვების მამა თუ შოულობდა, ხოლმე, სეზონურ სამსახურს. Სოციალურ შემწეობასთან ერთად გორგოძეები ბავშვებისთვის გამოყოფილ დახმარებას იღებდნენ და სოციალური სასადილოთი სარგებლობდნენ.

"მუნიციპალიტეტს საშუალებები რაც კი ჰქონდა, მაქსიმალურად იქნა გამოყენებული ამ ოჯახისთვის".

ბაღდათის მუნიციპალიტეტის მერი არჩილ გოგსაძე გვეუბნება, რომ Სოფელ ზეგანში გორგოძეების სახლი ადგილობრივი ბიუჯეტის სახსრებით გადახურეს. თუმცა, ბავშვებს სპეციალური მასწავლებელი სჭირდებოდათ და ისინი საცხოვრებლად ქალაქში გადმოვიდნენ.

გორგოძეებს ბაღდათში მერიამ საცხოვრებლად 33 კვადრატული ფართი გამოუყო, ყოფილი სტამბის შენობაში. Შვიდსულიანი ოჯახი იქ 2012 წლიდან ცხოვრობდა. Ამჟამად ბინა დაკეტილია.

"ხუთი წუთიც არ ყოფილა ეს ამბავი. მე ამ სახლის უკან მაქვს "ცეხი" და მუშაობისას მესმოდა, ხოლმე, ბავშვების ხმა, ვიცოდი რომ ამ სახლში ცხოვრობდნენ", - ამბობს თვითმხილველი, კობა ბოლქვაძე.

ხანძარი სახლში 9-დან 10 საათამდე გაჩნდა. Ცეცხლის გაჩენის სავარაუდო მიზეზად ბუხარი დასახელდა. Ამ დროს ბავშვების მამა, იმედა გორგოძე და ბებია მაღაზიაში, პატარებისთვის ტკბილეულის საყიდლად იყვნენ წასულები.

ოჯახის ახლობლები ამბობენ, რომ იმედა გორგოძემ ტრაგედიის დატრიალების შემდეგ თვითმკვლელობა სცადა. ის ახლა ბაღდათის მუნიციპალიტეტის სოფელ წითელხევში, მამისეულ სახლში იმყოფება. მასთან ერთადაა მისი სიდედრი, გარდაცვლილი ქალის დედა, ქეთინო გველესიანი.

მიცვალებულთა ცხედრები ამ დრომდე ქუთაისის პროზექტურაშია დასვენებული. მუნიციპალიტეტში გვითხრეს, რომ დაკრძალვის ხარჯს ადგილობრივი თვითმმართველობა გაწევს.
ტრაგედიის მიზეზს ექსპერტ-კრიმინალისტები არკვევენ. Საქმე სისხლის სამართლის კოდექსის 187-ე მუხლის მე-4 ნაწილით არის აღძრული, რაც გაუფრთხილებლობით ორი ან მეტი ადამიანის სიცოცხლის მოსპობას გულისხმობს.

Print E-mail
FaceBook Twitter
მსგავსი სიახლეები
ახალგაზრდა ქუთაისელი
მამაკაცი,  18 წლის ცოლის  გადაუდებელი ოპერაციისთვის ფულს
ყოველ დღე, თითო–თითო ლარით აგროვებს.
16:44 / 22.05.2020

ახალგაზრდა ქუთაისელი მამაკაცი,  18 წლის ცოლის  გადაუდებელი ოპერაციისთვის ფულს ყოველ დღე, თითო–თითო ლარით აგროვებს.

ქუთაისში, საცხოვრებელი კორპუსის
კედლის ფილის ჩამონგრევის შედეგად, მოქალაქის დაზიანების ბოლო
შემთხვევა 12 მაისს მოხდა.
14:25 / 22.05.2020
ქუთაისში, საცხოვრებელი კორპუსის კედლის ფილის ჩამონგრევის შედეგად, მოქალაქის დაზიანების ბოლო შემთხვევა 12 მაისს მოხდა.
მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.
ავტორის/ავტორების მიერ საინფორმაციო მასალაში გამოთქმული მოსაზრება შესაძლოა არ გამოხატავდეს "საქართველოს ღია საზოგადოების ფონდის" პოზიციას. შესაბამისად, ფონდი არ არის პასუხისმგებელი მასალის შინაარსზე.