საზოგადოება
ოთხწლიანი ბრძოლა სკვერისთვის და მღვდლისთვის გადაცვლილი მიწის ნაკვეთი
FaceBook
ქუთაისში, ცახელის ქუჩის მოსახლეობა ოთხი წელია მათ ეზოში არსებული სპორტული მოედნის მიმდებარედ, მიწის ნაკვეთისთვის სკვერის სტატუსის მინიჭებას ითხოვს.
ბოლო მიმართვა ადგილობრივებმა ქუთაისის მერიას ორი თვის წინ გაუგზავნეს.

ცახელის ქუჩის მცხოვრებლებმა სპორტული მოედნისა და დასასვენებელი სკვერის გადასარჩენად ბრძოლა მას შემდეგ დაიწყეს, რაც 2014 წელს ტერიტორია აუქციონზე გაიყიდა და ახალმა მესაკუთრემ მიწაზე საცხოვრებელი სახლის მშენებლობა დაიწყო.

ადგილობრივები მშენებლობას იმთავითვე შეეწინააღმდეგნენ და აცხადებდნენ, რომ მათი კორპუსების წინ არსებული ტერიტორია წლების განმავლობაში ბავშვების სათამაშო ადგილი იყო.

მოსახლეობის მიერ რამდენჯერმე მოწყობილი საპროტესტო აქციისა და ხელმოწერების შეგროვების შემდეგ, მერია იძულებული გახდა მიწის ნაკვეთზე მშენებლობა შეეჩერებია.

ცახელის ქუჩის მოსახლეობას მაშინ დაპირდნენ, რომ მიწის ნაკვეთს სკვერის სტატუსს მიანიჭებდნენ და იქ მშენებლობას ვეღარავინ შეძლებდა, თუმცა, ოთხი წლის შემდეგ საკითხი კვლავ ღიაა, ადგილობრივები კი შიშობენ, რომ თუ ამ ადგილით ვინმე დაინტერესდება, მერია მშენებლობის ნებართვას კვლავ გასცემს.

გასხვისებული სპორტული მოედანი და მოსახლეობა მღვდლის წინააღმდეგ

ქუთაისში, ცახელის ქუჩაზე მდებარე სპორტული მოედნის მიმდებარედ 881 კვ.მ მიწის ნაკვეთი ქალაქს ეკონომიკის სამინისტროსგან 2008 წელს გადმოეცა. 2014 წელს კი ადგილობრივმა თვითმმართველობამ მისი გაყიდვის მიზნით, ტერიტორია სამ ნაწილად დაყო. აქედან 360 და 424 კვ.მ მიწის ნაკვეთები აუქციონზე გაიტანა და მხოლოდ 97 კვ.მ დაუტოვა სკვერს, სადაც ბავშვთა გასართობი ატრაქციონი მოეწყო.

აუქციონზე ორივე მიწის ნაკვეთი გაიყიდა. 360 კვ.მ-ის მფლობელი ომარ სანებლიძე, იგივე მამა გიორგი გახდა, ხოლო, 424 კვ.მ მამუკა კოხრეიძემ შეიძინა.

როგორც ირკვევა, აუქციონზე გასხვისებულ ტერიტორიაში სპორტული მოედნის ნაწილი მოექცა. ერთ-ერთი ადგილობრივი, დონარა კინწურაშვილი იხსენებს, რომ ტერიტორიის ის ნაწილი, რომელიც მღვდლის საკუთრებაში აღმოჩნდა, ადრე მოედანი იყო.

"საბჭოთა დროს აშენდა აქ ძალიან დიდი სტადიონი. მთელი უბნის ბავშვები აქ მოდიოდნენ სათამაშოდ. შემდეგ, სააკაშვილის ხელისუფლების დროს მის ბაზაზე ახალი, მაგრამ შედარებით მცირე მოედანი მოაწყვეს. ახლა ბალახითაა დაფარული, მაგრამ მაინც ეტყობა ძველი მოედნის საზღვრები, რომელიც გაცილებით დიდია, ვიდრე მოგვიანებით გაკეთებული. ეს საზღვრებია სწორედ გადასული იმ ტერიტორიაზე, სადაც სახლის აშენება უნდოდა მამაოს. ბევრი ვიბრძოლეთ იმისთვის, რომ ეს არ მომხდარიყო", - ამბობს ცახელის ქუჩის მცხოვრები, დონარა კინწურაშვილი.

მოსახლეობის პროტესტის გამო, ქალაქის ხელისუფლება იძულებული გახდა დათმობაზე წასულიყო და მის მიერ აუქციონზე გაყიდული ქონება უკან დაიბრუნა. სანაცვლოდ კი მღვდელს (მამა გიორგი)  ცახელის ქუჩაზე ნაყიდი 360 კვ.მ მიწა ბუხაიძის ქუჩაზე 150 კვ.მ მიწის ნაკვეთში გადაუცვალა. მღვდლისგან განსხვავებით, ტერიტორია შეინარჩუნა მამუკა კოხრეიძემ, თუმცა, მას ადგილზე ამ დრომდე არაფერი აუშენებია.

მამა გიორგი გარიგების სანაცვლოდ ბუხაიძის ქუჩაზე მიღებულ მიწის ნაკვეთზე, სახლს უკვე აშენებს.


მიწის ნაკვეთი ბუხაიძის ქუჩაზე, სადაც მოძღვარი სახლს აშენებს

მამა გიორგი ამბობს, რომ მიწის ნაკვეთის აუქციონზე შეძენის დროს არ იცოდა თუ სპორტული მოედნის ნაწილს ყიდულობდა.

"მე ეს არ ვიცოდი. მაშინ რომ არ მქონდა საშუალება, გაყვეს და ნაწილი ვიყიდე მე. სინამდვილეში ადგილობრივს უნდოდა მანდ მშენებლობა და  ამიტომ აყვირებდნენ ხალხს. მერია ახლაც დროს ელოდება, რომ მისცეს იმ პიროვნებას, ვისაც უნდოდა. მე ვერ მიგუეს უბრალოდ იქ", - ამბობს მღვდელი,  თუმცა, არ აკონკრეტებს ვის სურდა ადგილზე მშენებლობა.

ქუთაისის მერიაში ამბობენ, რომ სპორტული მოედნის მიმდებარედ კერძო საკუთრებას ახლა მხოლოდ მამუკა კოხრეიძის მიწის ნაკვეთი წარმოადგენს, რასაც ვერ შეეხებიან, მამაოს ყოფილი ტერიტორიისთვის კი  სკვერის სტატუსის მინიჭების საკითხი პროცედურების დაცვით განიხილება. 


Print E-mail
FaceBook Twitter
მსგავსი სიახლეები
აკაკი წერეთლის სახელობის სახელმწიფო უნივერსიტეტის სტუდენტს და
თვითმმართველობის წევრს, გიორგი თვარაძეს საზოგადოების დახმარება
სჭირდება.
12:06 / 20.05.2024
აკაკი წერეთლის სახელობის სახელმწიფო უნივერსიტეტის სტუდენტს და თვითმმართველობის წევრს, გიორგი თვარაძეს საზოგადოების დახმარება სჭირდება.
ქუთაისში, მესხიშვილის ქუჩაზე მშენებარე საცხოვრებელი კორპუსიდან
ბეტონის მასალები ცვივა.
11:46 / 18.12.2023
ქუთაისში, მესხიშვილის ქუჩაზე მშენებარე საცხოვრებელი კორპუსიდან ბეტონის მასალები ცვივა.
მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.
ავტორის/ავტორების მიერ საინფორმაციო მასალაში გამოთქმული მოსაზრება შესაძლოა არ გამოხატავდეს "საქართველოს ღია საზოგადოების ფონდის" პოზიციას. შესაბამისად, ფონდი არ არის პასუხისმგებელი მასალის შინაარსზე.