ქუთაისიპოსტი

ტყიბულში, მინდელის სახელობის შახტში ბოლო 3 თვეში მეორე აფეთქება მოხდა. ამ დროის განმავლობაში შახტში დაღუპულთა რიცხვმა 10-ს მიაღწია.

ტყიბულში, მინდელის სახელობის შახტში 16 ივლისს, ოთხი მუშა დაიღუპა, ხოლო 6 ადამიანი დამწვრობით საავადმყოფოში გადაყვანეს.

შახტში აფეთქების შედეგად გარდაცვლილია - ლაშა ფორცხიძე, მიხეილ გამეზარდაშვილი, იოსებ ქარქაშაძე და მურმან ლილუაშვილი.

გამოძიების პირველადი ინფორმაციით, შახტის ერთ-ერთ გვირაბში, სავარაუდოდ, მეთანის აფეთქების შედეგად კედლების დეფორმაციას ჭერის ჩამოშლა მოჰყვა.

დილით მომხდარ ტრაგიკულ შემთხვევასთან დაკავშირებით შსს-მ გამოძიება სისხლის სამართლის კოდექსის 240-ე მუხლის მეორე ნაწილით მიმდინარეობს, რაც სამთო, სამშენებლო ან სხვა სამუშაოს წარმოებისას უსაფრთხოების წესების დარღვევას გულისხმობს, რამაც ადამიანის სიცოცხლის მოსპობა გამოიწვია.

გამოძიება იგივე მუხლით დაიწყო შსს-მ 2018 წლის 5 აპრილს მინდელის შახტში მომხდარი შემთხვევის შემდეგაც, როდესაც აფეთქებას 6 ადამიანის სიცოცხლე შეეწირა,  რა დროსაც ტყიბულში 13 ბავშვი დაობლდა. თუმცა გამოძიებით ჯერ არაფერი დადგენილა. შსს-ში აცხადებენ, რომ გამოძიება კვლავ მიმდინარეობს. 

ტყიბულის მინდელის სახელობის შახტში, 2016-2018 წლებში უკვე 16 ადამიანია დაღუპული.

შახტს საქართველოს ინდუსტრიული ჯგუფის შვილობილი კომპანია, "საქნახშირი" მართავს.

იმერეთის, რაჭა-ლეჩხუმის და ქვემო სვანეთის პოლიციის დეპარტამენტის დირექტორის ბესიკ ამირანაშვილის თქმით, გამოძიების დასრულებამდე ტყიბულში არსებული 25-ვე შახტი დღესვე დაილუქება.

pროფკავშირების ცნობით, მიმდინარე წლის 5 აპრილს მოხმდარი ტრაგიკული შემთხვევის შემდეგაც დროებით დაიხურა მინდელის შახტა, თუმცა იძულებითი მოცდენისთვის კომპენსაცია მეშახტეებზე არ გაცემულა. დაღუპულების ოჯახებზე ერთჯერადად გაიცა 10 ათასი ლარი თითო ოჯახზე.