ქუთაისის ცენტრალურ მოედანზე "მაკდონალდსის" ახალი რესტორნის მშენებლობა აქციით გააპროტესტეს.

მასში მონაწილეობა ქალაქში მოქმედმა რამდენიმე არასამთავრობო ორგანიზაციის წარმომადგენელმა, პოლიტიკოსებმა და მოქალაქეების მცირე ჯგუფმა მიიღეს.

ისინი ცენტრალურ მოედანზე ახალი კვების ობიექტის მშენებლობას ეწინააღმდეგებიან.

საპროტესტო აქციის მონაწილეების თქმით, "მაკდონალდსის" ახალი რესტორანი ქალაქის იერსახეს დაამახინჯებს. გარდა ამისა, ადგილობრივთა ნაწილისთვის, ამ მიზეზის გამო, მოედანზე არსებული საათის გადატანა მიუღებელია.

"ყველასთან შეუთანხმებლად, ფულების შოვნაზე გადასულმა ხალხმა გაყიდა მიწა. ერთხელ უკვე დაგვიმახინჯეს ქალაქი ჭავჭავაძის ქუჩაზე არსებული "მაკდონალდსის" სახით და ახლა მეორედ გვაფურთხებენ სულში. დღეს ბანერი ჩამოვხიე და ხვალ შუშებს ჩავამტვრევ," – განმარტა პარტია "თავისუფალი საქართველოს" წარმომადგენელმა, გოგი წულაიამ.

მან ქუთაისის მაჟორიტარ დეპუტატებსა და მოსახლეობას ამ საკითხზე აზრის გამოთქმისკენ მოუწოდა.

აქციაზე არ გამოჩენილან სასულიერო პირები, რომლებმაც რამდენიმე დღის წინ "მაკდონალდსის" მშენებლობა გააპროტესტეს და ქალაქის მერს ეკონომოკის სამინისტროსთან შუამდგომლობის თხოვნით მიმართეს. მათ ცენტრალურ მოედანზე, ქუჩის საათის მიმდებარე ტერიტორიაზე ტაძრის აშენება სურდათ.

ქუთაისიპოსტის ინფორმაციით, ამ საკითხზე სასულიერო პირებთან მოლაპარაკება შედგა. მათ ძველი ტერიტორიის სანაცვლოდ, რესტორანი "თოლიას" ადგილი შესთავაზეს, რაზეც სასულიერო პირები თანახმა არიან.

ქუთაისის ცენტრალურ მოედანზე "მაკდონალდსის" ახალი რესტორნის მშენებლობის მოსამზადებელი სამუშაოები უკვე მიმდინარეობს.

ობიექტს თბილისში რეგისტრირებული კომპანია "ელემენტ კონსტრაქშენი" აშენებს.

სამუშაოების ზედამხედველმა ქუთაისიპოსტთან საუბარში განმარტა, რომ რესტორნის მშენებლობა 6 თვეში უნდა დასრულდეს.

მისივე ინფორმაციით, რესტორნის ავტოსადგომი და საზაფხულო ტერასა მეორე იარუსზე მოეწყობა, ხოლო ზედა, მესამე იარუსზე დავით აღმაშენებლის სახელობის ტაძარი აშენდება.