ქუთაისიპოსტი

"ფაქტმეტრი" ვებგვერდ www.factcheck.ge-ის ბეჭდური გამოცემაა, რომლის პრეზენტაციაც ქუთაისში დემოკრატიის ჩართულობის ცენტრში გაიმართა.

როგორც შეხვედრაზე აღინიშნა, გაზეთის მიზანია იმ მოქალაქეებისთვის ინფორმაციის მიწოდება, რომელთაც მის ელექტონულ ვერსიაზე ხელი არ მიუწვდება.

პრეზენტაციაზე ისაუბრეს "ფაქტჩეკის" ზოგად მიზნებზეც, რომლებიც საზოგადოებისთვის ფაქტებზე დაფუძნებული ინფორმაციის მიწოდებას, საქართველოს პარლამენტის დეპუტატების, პრეზიდენტის, პრემიერ–მინისტრისა და მთავრობის ეკონომიკური გუნდის მიერ გაკეთებულ განცხადებებში ფაქტობრივი სიზუსტის, თუ უზუსტობების დადგენას გულისხმობს.

ზუსტი ინფორმაციის ცოდნა განსაკუთრებულ მნიშვნელობას იძენს 2016 წლის საპარლამენტო აჩევნებისთვის..ფაქტმეტრის იმერეთის გუნდმა უკვე გადაამოწმა 10 პოლიტიკოსის განცხადება, განაცხადეს პრეზენტაციაზე.

"ფაქტჩეკი ქართულ პოლიტიკაში საზოგადოებას სიმართლის დადგენაში დაეხმარება, იგი მას სწორი და ზუსტი ინფორმაციას მიაწოდებს და პოლიტიკოსთა მხრიდან საზოგადოებისადმი ანგარიშვალდებულების ზრდას შეუწყობს ხელს", - აღნიშნა "ფაქტჩეკის" წარმომადგენელმა, დავით ლიკლიკაძემ.

როგორც პრეზენტავიაზე აღნიშნეს, გაზეთი ლოკალურ საკითხებსაც გააშუქებს და რეგიონის პრობლემატიკაზეც იმსჯელებს. შესაბამისად, "ფაქტჩეკს" ანალიტიკოსები საქართველოს 6 მსხვილ რეგიონში ჰყავს, მათ შორის, იმერეთშიც.

"ფაქტჩეკი" საქართველოს რეფორმების ასოციაციის (GRASS) ინოვაციური პროექტია, რომელიც მისი პოპულარული და წარმატებული საერთაშორისო ანალოგების (www.politifact.com, www.factcheck.org) შესაბამისად შეიქმნა. პროექტის მხარდამჭერი ორგანიზაციებია: ნიდერლანდების სამეფოს საელჩო საქართველოში, გერმანიის მარშალის ფონდი, დემოკრატიის მხარდაჭერის ევროპული ფონდი და ამერიკის შეერთებული შტატების საელჩო საქართველოში.