მიმდინარე წლის 21 მაისიდან 23 მაისის ჩათვლით მდინარე რიონში წყლის დონე დაიწევს და ბუნებრივ ნიშნულს დაუბრუნდება.

ამ ინფორმაციას სს "ენერგო-პრო ჯორჯია" ავრცელებს. კომპანია სამი დღის მანძილზე გუმათჰესების კასკადისა და რიონჰესის წყალსაცავებზე გეგმიური გარეცხვის სამუშაოებს ჩაატარებს.

ასევე, მოხდება წყალსაცავებზე მდინარის მიერ ჩამოტანალი ნაგვის გატანა-გაწმენდა.

ამავე პერიოდში, "გუმათი-1", "გუმათი-2" და "რიონის" ჰიდროელექტრო სადგურები გაჩერდება.

გუმათჰესების კასკადისა და რიონჰესის წყალსაცავების გეგმიური გარეცხვის მიზანი მათი სასარგებლო მოცულობის შენარჩუნება.

"ენერგო-პრო ჯორჯიას" ინფორმაციით, სამუშაოები ყველა უსაფრთხო ნორმის დაცვით განხორციელდება, რაც შეთანხმებულია საქართველოს სახელმწიფო ელექტროსისტემასთან და საქართველოს გარემოსა და ბუნებრივი რესურსების დაცვის სამინისტროს გარემოს ეროვნულ სააგენტოსთან.