ქუთაისიპოსტი

ქუთაისის მერიის განმარტებით, რომ  მწვანეყვავილას მწერალთა და საზოგადო მოღვაწეთა პანთეონში დაკრძალვის ორგანიზება და ტერიტორიის მოწესრიგება შპს „ქართული ტრადიციები 2011“-ის ვალდებულებაა. 

შპს „ქართული ტრადიციები 2011“-ში   კი განმარტავენ, რომ ისინი მხოლოდ დაკრძალვის მომსახურებასა და ტერიტორიის დასუფთავება-მოწესრიგებაზე არიან პასუხისმგებელი.

"შპს „ქართული ტრადიციები 2011“-ის ფუნქცია მწვანეყვავილას მწერალთა და საზოგადო მოღვაწეთა პანთეონთან დაკავშირებით განისაზღვრება მხოლოდ დაკრძალვის მომსახურების უზრუნველყოფითა და ტერიტორიის დასუფთავება-მოწესრიგებით. პანთეონის ტერიტორიაზე ბალახის მოთიბვისა და ნარჩენების გატანის სამუშაოები რეგულარულად მიმდინარეობს. ამ ეტაპზე, წვიმიანი სეზონის გამო, სწრაფად მზარდი ბალახის სრულყოფილი გაწმენდა შეფერხებულია, თუმცა სამუშაოები ეტაპობრივად ხორციელდება და მდგომარეობა კონტროლდება", - განმარტავენ ორგანიზაციაში. 

შპს "ქართული ტრადიციები 2011" მუნიციპალური ორგანიზაციაა, რომელიც ქუთაისის მერიას ექვემდებარება. 

პანთეონი, სადაც საზოგადო მოღვაწეები არიან დაკრძალულები, მოუვლელია. ტერიტორია ბალახით არის დაფარული, ხოლო საფლავის ქვებზე წარწერები ნაწილობრივ წაშლილია.

მწვანეყვავილას პანთეონი 1956 წელს დაარსდა და სწორედ ამ წელს გადაკეთდა მწერალთა და საზოგადო მოღვაწეთა პანთეონად.