ქუთაისიპოსტი

300 დღეზე მეტია, რაც ჭიათურაში, ქალაქის ცენტრში საპროტესტო კარვებია გაშლილი და უწყვეტი პროტესტი გრძელდება.

ამასთან, 8 თვეზე მეტია, რაც ამ პროტესტის მონაწილეები: გიორგი ნეფარიძე, მერაბ სარალიძე, არჩილ ჭუმბურიძე და თენგიზ გველესიანი, როგორც მათი თანამებრძოლები ამბობენ, უკანონოდ შეკერილი ბრალდებებითა და არარეალური მუხლით, უსამართლოდ სხედან ციხეში.

მათი სასამართლო პროცესები 12 და 14 იანვარსაა ჩანიშნულია. სავარაუდოდ, 14 იანვარსვე გამოაცხადებს მოსამართლე განაჩენს.

"ფორმალურად საქმე დასასრულს უახლოვდება, თუმცა, რეალურად, საიმედო არაფერია. პროკურატურა სრულად იზიარებს საქმეში დაზარალებულად ცნობილი თენგიზ კობერიძის მოთხოვნას და ითხოვს ბრალდებულებისთვის კანონით გათვალისწინებულ პატიმრობას 6-დან 9 წლამდე.

მიუხედავად ადვოკატების ძალისხმევის, დაცვის მხარის მიერ წარმოდგენილი მტკიცებულებებისა და ეფექტური ჩვენებებისა, მოსამართლე თამარ მაზანაშვილი, ამ დრომდე, სრულად ეთანხმება პროკურატურისა და დაზარალებულის პოზიციას. ამის შედეგად, უკვე 253 დღეა, ოთხი ადამიანი უსამართლოდ არის თავისუფლებააღკვეთილი. ჩვენ კი, ვინც გარეთ ვართ, უწყვეტად და უტეხად ვაგრძელებთ სამართლიან პროტესტს, ყველა მიმართულებით და კანონის ფარგლებში, თუმცა, ამ უსამართლობის შესაჩერებლად, საჭიროა საერთო სოლიდარობა, გაერთიანება და ერთმანეთის გვერდით დგომა, განსაკუთრებით მაღაროელებისგან და ჭიათურელი ხალხისგან.

ეს ბიჭები მიტოვებას არ იმსახურებენ. ვისაც გსურთ გამოხატოთ სოლიდარობა, გიზიარებთ ანგარიშის ნომერს - #GE40BG0000000604733786GEL",- ამბობენ მაღაროელები.

ჭიათურის პროტესტის მონაწილეები 29 აპრილს დააკავეს. პროკურატურა მათ შუქრუთის მაღაროს დირექტორზე თავდასხმას ედავება - ჭუმბურიძეს და გველესიანს 4-დან 6 წლამდე, ხოლო სარალიძეს და ნეფარიძეს, თავდასხმის ორგანიზების ბრალდებით, 6-დან 9 წლამდე პატიმრობა ემუქრება.

ჭიათურელი მაღაროელები 313 დღეა, უწყვეტად აპროტესტებენ კომპანიის მიერ მათი შრომითი უფლებების მძიმე დარღვევებს, მათ შორის, ხელფასების გადაუხდელობას, უკანონო რეორგანიზაციასა და თანამშრომლების მასობრივ გათავისუფლებას.