ქუთაისიპოსტი

25 ნოემბერს, ჭიათურის 270-დღიანი უწყვეტი საპროტესტო აქციის მონაწილეები, დედაქალაქში, ჯანდაცვის სამინისტროსთან შეიკრიბებიან.

ისინი აქციას სწორედ იმ შენობის წინ გამართავენ, სადაც სამხრივი კომისიის შეხვედრები მიმდინარეობდა.

მაღაროელების საპროტესტო აქცია 14:00 საათზე დაიწყება. მათ ჯანდაცვის მინისტრთან გარკვეული კითხვები აქვთ:

"დღემდე არ გვაქვს პასუხი უმთავრეს კითხვაზე: რაზე შეთანხმდნენ და რას მოაწერეს ხელი, რის შედეგადაც ჭიათურის საწარმოებში დასაქმებული 3620 თანამშრომლიდან 2000 ადამიანი უმუშევარი დარჩა, ხოლო ამ 2000-დან 1050 დღესაც სამსახურში აღდგენის მოლოდინშია.

გვაინტერესებს: რას ითვალისწინებდა ის უკანონო რეორგანიზაცია, რომელიც „ჯორჯიან მანგანეზთან“ შეთანხმებით განხორციელა "ჭიათურა მენეჯმენტ კომპანიმ?"; რის ფასად უნდა აღმდგარიყო საწარმოო პროცესი — 2000 თანამშრომლის განთავისუფლების, რეპრესიების და მუშების დაკავებების ხარჯზე, რომლებიც უკვე 7 თვეზე მეტია, უსამართლო პატიმრობაში იმყოფებიან?

როგორც მოქალაქეებსა და მუშებს, გვაინტერესებს ვიცოდეთ სიმართლე. მოვითხოვთ პასუხს ყველა იმ კომპეტენტური პირისგან, ვინც ამ პროცესში მონაწილეობდა",- ამბობენ მაღაროელები.

ისინი მიმართავენ ტელევიზიებს, გააშუქონ მათი პრობლემები სრულფასოვნად, რეალურად, ისე, როგორც სინამდვილეშია. ასევე მოუწოდებენ მხარდამჭერებს, შემოუერთდნენ აქციას.

ჭიათურელი მაღაროელები დაახლოებით ცხრა თვეა, უწყვეტად აპროტესტებენ კომპანიის მიერ მათი შრომითი უფლებების მძიმე დარღვევებს, მათ შორის, ხელფასების გადაუხდელობას, უკანონო რეორგანიზაციასა და თანამშრომლების მასობრივ გათავისუფლებას. მაღაროელების მოთხოვნებს ახლა უკვე დაემატა ოთხი დაკავებულის გათავისუფლება. მათი გათავისუფლების მოთხოვნით, ჭიათურაში 5 000-ზე მეტი ხელმოწერა შეგროვდა.