ქუთაისიპოსტი

კურორტ საირმის მცხოვრებლები, რომლებიც უკვე მეხუთე თვეა, 13 296 ჰა მიწის ფართობზე სამონადირეო მეურნეობის ლიცენზიის გაცემას აპროტესტებენ, 24 სექტემბერს, ბაღდათში აქციისთვის ემზადებიან.

ისინი მერიის წინ 10:00 საათზე შეიკრიბებიან და საპროტესტო აქციას გამართავენ.

როგორც საირმის პროტესტის მონაწილეები განმატავენ, სწორედ ბაღდათის მერიამ არ უზრუნველყო სამონადირეო მეურნეობის პროექტის საჯარო განხილვა ადგილობრივების ჩართულობით, ამიტომ სურთ, თავიანთი ხმა ახლოდან გააგონონ.

ისინი მოქალაქეებსაც მოუწოდებენ, შემოუერთდნენ მათ უსამართლობის წინააღმდეგ ბრძოლაში.

" მეხუთე თვეა, ვმართავთ საპროტესტო აქციებს კურორტ საირმეში, სადაც მიმდინარეობს ადგილობრივი მოსახლეობის შევიწროვება, ჩაგვრა, რაც გამოიხარტება კერძო საკუთრების ჩამორთმევის მცდელობასა და სამონადირეო მეურნეობისთვის ლიცენზიის კანონდარღვევით გაცემაში. მოგმართავთ, შემოგვიერთდეთ ამ უკანონობასთან ბრძოლაში, ამჯერად ბაღდათის მუნიციპალიტეტის მერიასთან, 24 სექტემბერს, 10 საათზე.

მოცემული უსამართლობის ჯაჭვში, არც თუ მცირე რგოლია მერია, რომელსაც მთელი ამ ხნის განმავლობაში მცირედი ყურადღებაც არ გამოუჩენია, პირიქით საეჭვოდ იყო ჩართული პროცესებში. კერძოდ, არ უზრუნველყო სამონადირეო მეურნეობის პროექტის საჯარო განხილვა ადგილობრივების ჩართულობით და შეგვრჩა ოქმი, სადაც არცერთი ადგილობრივი არ არის! მოცემულ სიტუაციაში დუმილი დანაშაულია, მინიმუმ გულგრილობა, ამიტომ გავაგონოთ ახლოდან ხმა!",- ამბობენ საირმის მკვიდრები.

კურორტ საირმეში ადგილობრივები მეხუთე თვეა, 13 296 ჰა მიწის ფართობზე სამონადირეო მეურნეობის ლიცენზიის გაცემას აპროტესტებენ. ადგილობრივების თქმით, ლიცენზია უკანონოდ არის გაცემული. ამის გარდა, ლიცენზიით განსაზღვრულ სამონადირეო მეურნეობის არეალში მოქცეულია ადგილობრივების, როგორც თვითონ ამბობენ, მამაპაპისეული მიწა, რომელზეც პროკურატურა მოსახლეობას თაღლითობის ბრალდებით ედავება.

საქართველოს პროკურატურა კურორტ საირმეში 9 ოჯახს (თავდაპირველად 20-მდე ოჯახს, მაგრამ დანარჩენებმა საპროცესო შეთანხმება გააფორმეს) მიწის ნაკვეთების მითვისებას ედავება, უწყება მათ თაღლითობაში სდებს ბრალს და მეპატრონეებს 6-დან 9 წლამდე პატიმრობა ემუქრებათ.

პროკურატურამ გამოძიება 2021 წლის დეკემბერში, სატყეო სააგენტოს საჩივრის საფუძველზე, დაიწყო. ბრალდებულები ამბობენ, რომ მათ წინააღმდეგ მიმდინარე გამოძიება კურორტ საირმის მფლობელის, თემურ კოხოძის ინტერესებს ემსახურება. სწორედ კოხოძის კომპანიაზე გაიცა სამონადირეო მეურნეობის ლიცენზია.

ადგილობრივების ბრალდებებზე "ქუთაისიპოსტმა" შესაბამის უწყებებს ( ბაღდათის მუნიციპალიტეტის მერია, საქართველოს პროკურატურა, თემურ კოხოძის კომპანიას) ოფიციალური წერილები 20 ივნისს გაუგზავნა, თუმცა პასუხები ამ დრომდე არ მიგვიღია.


ამავე თემაზე:

"საჩივარში ეწერა, გვწყევლა ლელა მესხიამ და ჩმორი გვიძახაო",- საირმის პროტესტის მონაწილე პოლიციაში, გამოკითხვაზე იმყოფებოდა

"მირეკავენ ბაღდათის პოლიციიდან, მიბარებენ გამოკითხვაზე"- საირმის პროტესტის მონაწილე

"საჩივარიაო, თითქოს მე ვიღაცას დავემუქრე" - საირმის პროტესტის მონაწილის, ვეფხია მესხიას სახლში საპოლიციო ჩხრეკა ჩატარდა